افهموا عاد ما أبى أعرس ....... غصب يعني!!!

السلام عليكم

((يمكن تقولون ... " شسالفتها هاذي منزله موضوعين اليوم .. مب من عوايدها !!"
بقولكم عقب ما أطرح الموضوع إللي خاطري أطرحه من زمااااان))

سمعنا اخواني عن عزوف الرجال عن الزواج ........ لكن عزوف النساء عن الزواااج!!

شي ممكن يستغرب منه بعض الناس .... وظاهره ممكن يعرف عنها البعض الثاني .. فيكم من سمع عنها ومنكم ما يعرف شي عنها.. وأنا عن نفسي سمعت بإذني وحده تقول "ما أبى أعرس ... غصب يعني؟؟!!" فلو كانت هالنسبه ضئيله .. لازم يكون هناك أسباب تخلي البنت ما تبى تعرس....
فليش برايكم البنت ما تبى تتزوج؟؟؟

((هذا هو الموضوع إللي أبغي أناقشه وياكم))

((أما بالنسبة لتنزيلي لموضوعين هو إني خلاص هاي آخر مره أنزل فيها مواضيع ... فقلت أنزل إللي في بالي .... اسمحولي اخواني لأني خلاص بقطع المنتدى أو بحاول إني أقطعه ... صح صعبه .. بس شو نسوي ورانا سنة على قولتهم سنه مصيريه!!!
"ثنويه عامه" فلازم إنشد في الدراسه ..
وإنشاء الله برد مره ثانيه
إمممممممممممممممممممممم
شهر سبعه ... عقب النتايج ... عاد لا تحرموني من دعواتكم..
لا صح لي رده قبلها إنشاء الله ..... برد دقايق للمنتدى أطالع ردودكم على عزوف البنات عن الزواج لأني مستغربه منها الصراحه فيمكن حد منكم يعرف الأسباب و يخبرني بها))

اختكم
همس

اختي همس....

بقولج لاردي بسرعه لاني بطلع..... وقتي مثل العاده دايما يسرقني


مره سالت وحده هالسؤال وقالتلي ما ابي اتزوج...
لاني خايفه يصير فيني اللي صار فوحده اعرفها لان ريلها كان يصربها ويخونها

وثانيه قالتلي... لاني جفت ابوي يخون امي جدامي... وانا عمري 10 سنوات ...
ووحده قالتلي مره ضربني ابوي ضرب.. ومن ذاك اليوم انا اخاف من كل الرياييل...

وهالبنات كانوا من اجمل البنات اللي عرفتهم واعتبرتهم خواتي...
رقيقات ومحترمات وكل انسان يتمناهم بس الزمن لعب لعبته فيهم...

بس لو لقوا اللي يستحقهم راح يروحون معاه... بشرط ينسيهم هالهموم

ولي عوده

اخوج
بو وليد

السلام عليكم

أنا صراحةً ضد مثل هذا التفكير ..

كان ولازال الزواج ستر للفتاة ... ووقاية لها من مفاتن الدنيا ..

مهما كانت الظروف التي تجعل الفتيات يعزفن عن الزواج ..

فيجب على الأهل الجلوس مع هذه الفتاة .. جلسة مصارحة ..

حتى تصارحهم بأسبابها التي جعلتها تعزف عن الزواج ..

وكما ذكر أخي (( أقرع مقيرع )) عن الأسباب التي جعلت

هؤلاء الفتيات يعزفن عن الزواج .. فإنني أرى بأن يجب اقناعهن

بأن الرجال ليس كلهم على نفس الصفات .. فبدعائها لنفسها

بأن يرزقها الله - سبحانه وتعالى - الزوج الصالح ... فسيكون لها

بمشيئة الله الإستجابة من رب العالمين ..

وإن عفّت نفسها ... وحافظت على نفسها من كل مفاتن الدنيا

فإنها بمشيئة الرحمن .. سيكون لها ذلك الزوج الصالح الذي

تريد ... يكون لها زوجاً وصديقاً وأخاً ..

لذلك تتعدد الأسباب التي تجعل الفتيات يعزفن عن الزواج ...

ولكن .. أرى بأن المصارحه ..هي الحل الأمثل لمعالجة مثل

هذه الظاهرة التي أتمنى أن لا تزيد نسبة من يعزفن عن الزواج

لمثل هذه الأسباب التي يستطعن بمشيئة الله تخطيها ..

===

أختي همس الوجود ..

وفقك الله في دراستك ... وجعلك من المتفوقين ..

غيبي عنّا وكوني على ثقة بأننا ندعو لك دائماً بالتوفيق ..

غيبي .. وعودي بعدما حققتي انجازاً تفاخرين به ..

تقبلي مني احترامي لشخصك وقلمك الرائع ..

جلّ تقديري

موت غاوي

برايي في اسباب كثيره تخلي البنت تقول مثل هالكلام

مثلا

ضروف واجهتها مثل الضروف اللي ذكرها اقرع مقيرع

بس في سبب ثاني و هو الحيا او بالاحرى الخجل انها تعترف انها تبغي تتزوج
يعني شو بيقولون عنها البنات لو شافوها تقول تبغي تتزوج غير انها ما تستحي!!!


و في سبب ادري انه غبي بس بعد موجود

و هو انه يت فتره بين البنات اللي تقول انها ما تبغي تتزوج هي اول وحده من البنات تتزوج (لووووول يعني خطه معكوسه)

بس بعد فتره تقوم بنفسها تصدق كلامها و يصير عندها في نفسيتها هالشي هو الصح

ترا جد ما امزح هذي كلها اسباب شفتها في الدنيا و لو مثل ما قلتي اختي هي بنسبه بسيطه و لكنها موجوده

في سبب جا على بالي

يمكن البنت يكون في بالها شخص معين او تصور معين لزوج المستقبل و ما تبغي تاخذ اي حد... فلما الاهل يخبرونها مثلا انه في حد جا و خطبها يكون عذرها انها ما تبغي تتزوج و انه شي مب غصب عليها

و في بنات ما تبغي تتحمل المسؤوليه و خاصه مع الزوج تلحقها مسؤوليه بيت و عايله و عيال فمتى بتلقى لنفسها الوقت (هذا الراي يعتمد على تربيه البنت فالاغلب انه هالبنت متعودة على انها ما تتحمل المسؤوليه في البيت)

و سبب ثاني انها ما تبغي تفقد الحريه اللي هي عايشه فيها... خاصه بعد القصص اللي نسمعها من انه زوج خلى زوجته مثل البشكاره في البيت و هو له الحق يطلع و يتنفس و هي لا

تسلمين يالغلا ع الموضوع..

فليش برايكم البنت ما تبى تتزوج؟؟؟

اسباب واايد يالشيخه..

وانا اظن ومن اهم الاسباب .. الشباب واللى مستوي فيهم

يرمس مليون وحده ويوم يتزوج وحده يتم راص عليها يشك بكل شي وفي منهم جي ومنهم العكس ..

ومنهم اللي يجوفونه من دلع وخقه....

تحياتي لج..

بالنسبة لي انا ما اوافق ولو وافقت اوافق بصعوبه لهذي الاسباب:
1- لا يوجد رجلا او قليل من الرجال من يتحمل المسئولية..
2- الرجل اذا تزوج المرأة تملكها فكأنها لعبة عنده
3- لا اعلم اخاف ان وافقت ان يكون غير ذو دين فأندم طوال عمري فهذا مستقبلي ..
اخراً لاتقولون متعقده الحمد لله اهلي لكلهم ناس طيبين

هههههههههههههههههه
صراحه انا اول وحده مابا اعرس
لانه اجوف قله الشباب في هذا الزمن اللي يتحملون مسؤوليه بيوتهم
يعني الواحد يعرس ويخلي كل شي على حرمته
والصراحه بنات الحين يوم يعرسن يبون الريال بس يظهرونهم ويتمشون وجي بس مايدرون ان الزواج مسؤوليه كبيييييييره

والسمووووحه

اشكرج الغاليه عالموضوع
دمت بود

يعطيج العافيه الغاليه على الموضوع
والله يوفقج في امتحاناتج

ماشاء الله الأعضاء ماقصروا قالوا أغلب الأسباب اللي ممكن تخلي
البنت تعزف عن الزواج ..
محد ينكر ان في من الناس الصالح والطالح ..
ما نلوم البنت لو قالت مابي أتزوج لانها تشوف مواقف أوتسمع قصص
اللي زوجها يضربها .. واللي يشك فيها .. واللي يخونها
واللي يعاملها مثل الخدامه عنده .. واللي ما يهتم فيها
وغيره وغيره ..
لكن الحمد لله لين الحين الدنيا بخير
وتجارب غيرنا ما تخلينا نحكم بشكل عام عالكل

تقبلي تحياتي






سلامي
rouvana

السلاااااااااااااااام عليكن اخواااااااااتي

أحترم آرائكن .................بس.................

تراه صبوع الإيد الوحده مب قد بعض ..... و الرياييل مب نفس بعض

منهم الزين ومنهم الشين وإنشالله يكون نصيب كل وحده فيكن إنسان دين يحافظ عليها وما يعاملها مثل اللعبه نفس ما

قلتن ......... لا يعاملها مثل الدره يحافظ عليها و يصونها ....

اختكن
همس