صور من رحلتي للبر..""مع رووح الظفرة""

ذبحني الشوق

بسم الله الرحمن الرحيم..



من بعد غيبة طويله يبت لكم عدد من صور ""طبعا من تصويري""
وفي كم صورة مع ""رووح الظفرة""
""الدبة سبقتني ونزلت الموضوع قبلي""بس مب كل الصور""
حبيت اني اظيفهن لهالقسم وتشوفون كيفيه تصويري وتستفيدون من المعلومات اللي بضيفهن للصور
طبعا صور تراثية وكلها عن البر..


اولا حبيت اقول لكم..اني كنت بسوي قسمين او موضوعين..
1-صور من رحلتي للبر..
2-صور تراثية..

بس حبيت اجمعهن في موضوع واحد وكل معلومة بتدون تحت صورتها""وماخليت صورة وماعلقت عليها يقولون اني ام التعليقات""..الصور وايدة شوي بس ان شاء الله يعجبكم تصويري وصوري..

ملاحظة:
انا ما ضفت أي تأثيرات ع الصور بس ضفت لها ايطار اسود ..
(1)
صورة لنقيان""كثبان رمليه""
في هاليوم كان غيم وبراد علينا والجو روعـة عشان جيه صورت النقيان من بعيد




(2)
صورة لليعولة"مادري انا اسميها جيه"وكنت بالصدفة طالعة من الخيمة وشفتها فـ صورتها..


(3)
اقوم الصبح ع الساعة 7 او 8 والاقي يدتي مورية الضو جدام خيمتها عاد اروح لها واقعد اتريق بس ريوقي في الصورة اللي بعدها..""بس روحوة ترقد لين الضحى""اخاف تفلعني بالنعل لاتقولون لها بليز...


(4)
هذا ريوقي..وبعض الايام اتريق بيض مع طماط"بس للأسف ماحصل لي شرف اصوره"


(5)
عاد هالمرة كنت مارة من خيمة يدتيه وسمعت صوت قرقعة مواعين"اونها ترتب"
فدخلت وهي ماتدري بي وانا ماسكة الكيمرة واصور"كيمرتي فيديو مع فلاش"
ودق في بالي ليش ما اصور شوي من سامانها"اغراضها"وطلعت هالصورة وبقول لكم كل اسم من هالادوات..
اول واحد ع اليمين المنحاز "هذا يدقون فيه اللومي اليابس او القهوة وبعض الاحيان القرص..واشياء وايدة غيرها"
عدالة مثل ماتشوفون رز البسمتي هذا احسن نوعيه رز تحبه يدتيه
تحت المنحاز طوس او ملال بعضها نحط فيه الغسول"اللي هو الماي لغسل اليدين بعد الاكل "
او نغسل فيه الرز قبل لانطبخة
عدال الطوس "الغوري"وهذا تحط فيه يدتيه اللبن "او الحليب المصخون"
عداله الملاس"وهو الملعقة الكبيرة نستخدمها للطبخ ""نطبخ بها غدى يدتيه""
ويوم نشوي القرص في الضو"النار" نستخدمها..واستخداماتها متعددة..
عداله..غرشة ماي..
الغوري الاصفر..هذا غوري القهوة عاد يازين قهوة يدتيه ع الفجر حوالي الساعة 5 الفجر تقوم وتوري الضو ويالله تسوي القهوة اللي تقند الراس..
تحت الغوري الاصفر دلة زرقاء وتنحط فيه القهوة بعد ماتسويها يدتيه..
""وعاد ماصدقت من الله رحت لروحوة ورويتها الصور ""




يتبــــــع

ذبحني الشوق

(6)
صورة للكروزن..صورة حرة من صوري..


(7)
في هاليوم رووح الظفرة راحت عنا وانا محد عندي وكنت ملاااانة واسمع mp3 ودق في بالي اروح احطب
في هالجو المغيم الفنااان وصورت الحطب اللي حطبته مع خلفية حلوة..


(8)
الحين ببتدي في صور مختلفة وعليها شوية تعليقات..
هاي صورة للخيمة ""عشان اللي مايعرف شو هيه الخيمة يعرفها..""


(9)
صورة للبرنوص""او لحاف..غطاء""في يوم سمعت برنامج التراث في امارات اف ام وفي سؤال يقول شو هو البرنوص ومحد عرفة فـ حبيت اني اروي اللي مايعرف البرنوص يعرفة..
""وهالبرنوص مال البرد يدفي الصرااااحة في اللياالي الباردة..


(10)
نفس الحاله ملانة وقعدت العب في قشار يدتيه..
من اليمين البرقع""اللي يلبسنه العيايز..عداله مرود..""المرود يحطونه في الكحل ويوضع في العيون"ماعرف كيف افسر اكثر من جيه..
عداله الكحل""الجحال"اما الكرتونة الخضراء..بوفاس"ماري شو خصة في هالصورة"



يتبـــــع

دانة الدوحة

السلام عليكم ورحمة الله وبركاته

مرحبا الوم

شخباااااارج؟؟ وينج من زمااااااااااااان ماجفناج اون لاين؟؟

هاااااااااااا اشم ريحة خيانه رايحة البر ولاتقولين معاليه معاليه ههههههههه<اتغشمر

تسلميييييييييييين عالصور حلوة وايد..وايد صور عجبوني ..ومنهم صورة الرمل من بعيد ناااايس وبعد صورة الاشجار جنااااااااااان

هههههههه والتعليقات الاحلى


ويعطيكم العافية انشالله

وبانتظار يديدج


اختج

دانة الدوحة

ذبحني الشوق

(11)
دله عدالها الملاس..جدامهم دهان يسمى""دهان صفوة" وهذا يستخدم للشعر ومفيد"ع قوله يدتيه"
عداله فنيال"فنجان"يستخدم لشرب القهوة او اللبن او الماء..


(12)
طاسة""نصب فيها اللبن ونشرب منها مباشرة"بس بيني وبينكم ما حب اللبن مادري ليش وع قوله يدتيه"انتي ماتحبين غير حليب الجلاب ولا البقر"لأنها تشوفني اشرب حليب العين..


(13)
السقى.."وهذا ينخض فيه اللبن ليصبح روب او حامضة"مثل ما نحن نقول."يربط بالحبل ويعلق في مرتفع ليسهل الخض"او الري"


(14)
المدخن يوضع فيه اليمر"الفحم الوالع"ويوضع العود او المعامول"


(15)
الفنر..مثل الليت او المصباح يوضع فيه قاز ونشغله في الخيمة
"السموحة مكسورة زجاجته بس حبيت اصورة لكم"



يتبــــــع

ذبحني الشوق

(16)
التانكي..""يمكن يسمونه جالون باللغة العربية والله ماعرف..بس هذا ينحط فيه الماي للحمامات او المطبخ .."
ومادري ليش صورته بس حبيت اضيفه..



(17)
السرود..بساط ينحط عليه الفواله او الغدى او العشى..


(18)
نبعد شوي للأجواء ثانيه..
صورة للتيس..""تيس يدتيه وماتدري اني صورتة..""
ويوم اذبحوة عند العشى يبت الكيمرة وقلت ليدتيه تشوفين هالتيس؟؟
واضحكت عليه لأنه كان مطبوخ جدامنا ع التلغه وقاعدين نتعشى وانا اوني صحت عليه ورديت اتعشى"مقوى قلبي توني اصيح عليه والحين آكله؟؟


(19)
برايد..اكل للغنم او البوش..


(20)
شمال..يوضع لحمل ثدي الناقة..



يتبـــــــــع..

ذبحني الشوق

(21)
الدعون..هذا يحوط بالعزبة ليصد الرياح القويه""السهيلي""والبرد..
وفي نفس الوقت ستر لنا""لأن الحريم يقعدن برى الخيام ويوم تمر سيارة ماتشوفنا وناخذ راحتنا في القعدة"


(22)
المحور..وهذا يحطونه عشان يثبتون الخيمة فيه ""يربط بحبل الخيمة..""وبعض الاحيان يدحبون الخيش الخاليه بالتراب ويربطون الحبل به بدال المحور..


(23)
الترجيبة"التركيبه"ينحط على الضو عشان نصخن اللبن او نطبخ الغدى ع الضو..""وعاد يدتيه كل يوم تطبخ غداها ع الضو..


(24)
وآخر صورة..
ماننسى رادوية الحبييييب اللي ما استغني عنه لافي البر ولا في البحر..""خخخخخخخخخخخ""
وقلت بشتري يديد بس ليش الخساير دام انه صلحان؟؟



والسموحة منكم وان شاء الله تستمتعون في هالرحلة وتستفيدون ...تحياتي..
""يالله انتظر رايكم""



ما انســـــى ختامها مسك....

كنت مصورة كاب عيناوي وقلت لازم اصورة

ذبحني الشوق

هلا هلا


وييين مارقبتي لي ماخلص كل الصور...


المهم يسلمووو ع المرووور الطيب..

دانة الدوحة

هههههههه الوم دومي ارد بسرعة ههههههه حتى قبل لا تخلص الصور


تسلميييييييين عالصوووووووووور روعة

هههههههه

مالي ويه اتكلم

دلع الظفرة

آآآآآه بموووت خيانه... ليش جيه انتي شريرة ..

أنا إنسانه وعندي مشاعر ... ليش تسووون بي جيه ...

تصورووون البر ... وانا هنيه احترق ... المرة اليايه إن شاء معاكن ...

كيفكن عاد شئتن أو أبيتن ...

بس صراااحة الصور رووووووعة ..

تسلم يمناج الغاليه ... وتسلم يمنا توأمي الغالي " رووح الظفرة "


إختج / شخص تمنيته

رحالة العمر

ماشاء الصور واايد فنانه ألم الظفرة وانا بانتظار يديدج دوم..