جاوبوني بصراحه شو رايكم بعلاقة وحده مع واحد فالتلفون انها تنتهي فزواج ؟؟؟

ii_amna_ii

الســــــــــلام علــــيكم ورحمة الله وبركاته

أعزائي أعضاء ألم الإمارات:....

حبيت أشوف آراءكم وأستشيركم بسالفة ربيعتي اللي شاغله بالي...
أنا عندي ربيعة ماشالله عليها خلوقه وملتزمه وقعت بشباك الحب وترمس واحد فالتلفون وهالإنسان على حسب ما سمعت انه وايد محترم وخلوق. بما أن اللي يسوونه غلط قرروا يتزوجون عسب لا اتم علاقتهم بالحرام وبعدو عن بعض فتره ....

فهي دوم تسألي وتبا راايي ... هل اللي تسويه غلط .؟؟ مع أنها حاولت انها تبعد بس كل ما تستخير ربها تلقى نفسها مرتاحة حق هالريال .....

أرجوكم لا تخيبون ضني فيكم وسمعوني آراءكم....

ومشكوورين
أختكم

ii_amna_ii

ii_amna_ii

ويـــــــــــــنكم يا أعضاء

بغـــــــــــيت تجاوبكم ويااااااااي

الروح الغرامية

احــــــــــم ...

السلام عليج ...

باعطيييج رايي فهالموضوع .. وسووووري جان اتاخرنا عليج ..


شوفي حبووبه انا وحده اقولج كنت محطيه في بالي .. انه مستحيل علاقه مصيريه مثل الزواج تنجح .. اذا كانت باديه بشي غلط مثل الرمسه فالتيلفون بين واحد ووحده ..
على كثر ما سمعنا طبعا .. والله فلان ماخذ وحده كان مرمسنها والحينه هب مرتاح معاها ..
وفلان غيره . مرمسنها .. ومامنبها .. ما يدري بسواياها .. وهي حليلها مالها خص بشي ..

يعني السالفه كلها رمسة ناس فرمسه ...

اوكيه انا جني سرت شويه بعيد عن السالفه

انرد لسالفتنا

شوفي غناتي .. والله قريب افكر بها لسالفه .. وواايد هامتني والله ..

اول شي ربيعتج صلت صلاة الاستخاره .. يعني سالت ربها .. وربها ريحها ... يعني ان شاااء الله خير هذا وااحد

وبعديين

اول شي هو ريال .. يعني هذي مب اول وحده يرمسها .. وعلى فكره الرياييل ما يحطون سالفه العرس بين عيونهم يوم يرمسون وحده .. بالعكس اتكون هذي آآخر فكره على بالهم .. ويمكن ما اتيي بعد على بالهم

البنت اذا رمست واحد اتكون محطيه العرس في خاطرها ... وهذا شي معروووف سوااء عن الحريم والا الرياييل

ارد اقولج احتمال ما اتكون اول وحده يرمسها هذي .. يعني يميز بين البنات اللي ما ينفعن والبنات الاوكيه .. صح انها رمسته .. بس يمكن من ضغط يمكن من شي كان في خاطرها .. يعني حرام انها تنظلم رمست واحد يعني اختربت خلاص ..

هذي نظره خاطئه من المجتمع ...

ما اقولج اللي تسويه هي صح .. بس تراه صار واستوى يعني كلامنا ما بيسوي شي ألحينه ...

انزيييييييييين ... الريال عقله دوم اكبر عن البنت .. يعني طريقة تفكيره تختلف عن طريقة تفكير البنت ...

وانا اقولج .. دامه فتحلها سالفة العرس وناوي يخلي كل شي رسمي .. معناته انه انسان عاقل .. ومن خاطره يباها ..

وهذا حسب رايي انا
وان شاااء الله اي شي ايي في بالي عن هالسالفه .. برد وبكتبه لج

ترتووب حبوبه

ريانةالعود

اممممممم

عندي ربيعتي نفس الحاله بالضبط


صارلها معاه سنين


قلتلها اذا هو يباج من الخاطر

يدل ويوصل باب هلج

لي متى يبتمون ع هالحاله


وانا رايي من راي اختيه البنت لارمست واحد تحط في بالها الزواج


والريال مستحيل يفكر في وحده يرمسها لانه دووم تفكيرهو

انه اذا هي ترمسه اكيد ترمس غيره

وتبقى وجهة نظريه والسموحه

الروح الحزينة

هلا اختي

الصراحه مادري اقولي بس انا أقووول انا الزاوج مابينجح اذابذي الطريقه
ومادري والله ااذ هو زي ماتقوولي شاب طيب
بس انا اعرف ناس وايد يكلموو شاب محترم
وتالي يتغير 180 درجه
يقول يمكن كلمت غيري
وان شاء الله يعجبج كلامي

تحياتي:الروح الحزينه

أحلى مشاغبه

ممممم
أنا من وجهة نظري إن كل شي يبني على أساس خطئ مستحيل يستمر وينجح
بس دامها استخارت ربها ورتاحت يعني إنشاء الله ربي بيسر لها حياتها
ومب شرط نحكم على حياتها بالفشل من خلال قصص سمعناها لان عبيد مب شرات سيف يعني يمكن يطلع هالانسان طيب وخلوووق
بس مب معناته ان اشجع الحب قبل الزواج لان بوجهة نظري حب فاشل
والسموووحه

بندر الخالد

السلام عليكم ورحمة الله وبركاته

صباحكم ورد وزهور

اخواني واخواتي

مافي احد يقدر يحكم على سالفة الاخت

لان ماحد يدري هالرجال يلعب والا صادق بكلامه

يمكن البنت اعجبته ولقى راحته عندها

يعني تكون طيبه وبنت ناس وماعليها قصور <<< من وجهة نظر الرجال

فان شاء الله انه يرد للطريق الصحيح ويدل بيتهم

اما سالفه انه يقعد واياها سنوات يكلمها وماعنده سالفه وهي مصدقه ان بيوم راح يخطبها فما اعتقد ان هالرجال ناوي على خير ونصيحه تبتعد عنه قبل لا يصيبها ااذاه

الله يوفقك ويوفق ربيعتك ويكتب لها الخير بطريقها

والسموحة على القصور

اخوكم

الخــــ بندر ـــــــالد

وروووووووووود

عزيزتي.........

بريحج واختصرلج كل الي عندي بكلمتين....

في مجتمعنا الخليجي مرفووووضه البنت اللي تكلم ..

وحتى لو خذاها مستحيييييييييييل تتم لها السعاده الزوجيه الا مايكون بينهم شك
وعدم ثقه..

لاتروحين بعيد كل يوم تطلعلنا سالفه مثل جيه ونهايتها الفشل....

انصحي ربيعتج اذا تحبينها وقوليلها((اللي يبدء بغلط ينتهي بغلط))
اليوم كلمها بكررررررره غيرها وهي هم كذلك بيقول عنها..

والسموحـــــــــــــــه

مع خالص الود..ورووووووووود

الروح الغرامية

السلااااااااااام عليكم ..


اخواااني ... كلي انتوو..


لاحظت من ردود الاغلبيه انهم ما يشجعون هالنوع من العلاقات ..

بس هالكلام الحينه ما ينفع لانه السالفه صارت واستوت ..

وليش مب ممكن ان يستمر معاها .. ؟؟

وليش بيكون بينهم شك عقب ..؟؟

يعني ممكن الريال قلبه يتحكم به .. ويخليه يتسرع بحكمه .. ما اظن لان الريال مثل ما قلت قبل آآخر شي يفكر فيه العرس .. وهو فاتحها فهالسالفه وابتعدو عن بعض شويه ..


شو اللي يمنع انهم يكملون علاقتهم بالحلال .. وربي يسعدهم ..

ما اظن فيه شي يمنع ..

اذا انا بتفكيري انهم ما بينجحون .. وفلانه بعد .. وعلاانه ..

الريااال شرى ما قالت اختيه سيف هب شرى عبيد ..


يعني ما نعرف زينه من شينه ..


بس ان نحكم على هالعلاقه بالاعدام من الحينه اظنها حرام



يعني مثلا انا اقولكم هالسالفه وصايره عندنا فالعااااااايله .. وناس كباااار الحينه ماشالله


كانو يرمسون بعض فالتيلفون .. هذا غير الصور المتبادله بينهم .. وغير الرسايل .. هو فمصر وهي فالاماارات .. وما قطعو بعض ... وعرسو .. والحينه والله العظيم والله العظيم والله العظيم انهم سمنه على عسل .. واكبر عيالهم صف خامس ابتدائي" ربي يديمها ان شااااااااء الله "

الدنيا حلوه ومره .. يعني ماحد يروم يقول انه ما فيه بين اي اثنين ضرايب ومشاكل .... الضرايب والمشاكل موجوده في كل بيت ..

واذا بتقولون هذا من زمان .. اقولكم من شباب هالوقت .. ومن جيلنا ... وبعد من هلي .. يرمسون بعض فالتيلفون .. وما قال ان فلانه ممكن اترمس غيري .. والا اتشوف على غيري ... و ان شاااااااااااااااء الله عرسهم على هالصيف ...

صحيح اني كنت معارضه هالنوع من العلاقات .. بس من اللي اشوفه ... وانا الاااحظه بعيوني الثنتين .... الصراحه غيرت هالفكره



وهذااا اللي عندي ..




والسمووحه جان طولت عليكم

ii_amna_ii

الروح الغرامية


ريانةالعود


الروح الحزينة


أحلى مشاغبه


بندر الخالد


وروووووووووود


الروح الغرامية


مشكــــــــــــورين كلكم على تفاعلكم وياي...... ^_^ بصراحه استانست وايد يوم شفت ردودكم وآراءكم اللي أثلجت صدري ....

بس على فكره ترى علاقة الريال هذا ويا ربيعتي عدل منها وايد أشياء يعني دوم يقولها تذكر ربها وملتزم بصلاته وعلاقته مع أهله من أحسن ما يكون وما عنده علاقات سابقه ويا بنات..

وفآخر فتره طلب منها يوقفون هالعلاقه اللي فالتلفون وأنه بيطلب ايدها من أهلها...