|--*¨®هل علينا الشهر الفضيل وهلوا علينا شرات الجراد ®¨*--|

فالبداية :


مبارك عليكم الشهر الفضيل ..

كل عام وانتوا بخير ..

وتقبل الله صيامكم وطاعاتكم ..

وغفر الله ذنوبكم ..



شهر رمضان له ما له من أهمية ..

وطبعاً كلنا نعرف شو هو شهر رمضان ..



ولكن هناك فئات يستغلون هالشهر الفضيل فأمور كل سنة تزيد

عن حدها ...




ندخل فصلب الموضوع .... :


الموضوع قديم متجدد ..

ولكني طرحته للتذكرة ...




هل علينا الشهر الفضيل وهلوا

علينا شرات الجراد .. !!!! ..



منهم :



* متنقبة وتتمسكن .


* يصيح ويدعي المرض .


* محمل الأدوية ويحوم ورا الناس يبا يشتري

دوا لحد من اهله .


* وحد عنده خريطه يتالي ويبا حد يساعده

يبني مسجد .


* يهال يستغلون الناس من كل صوب .


* ناس تقتحم البيوت لا هود ولا مستحى .


* اللي شاحن عياله وزوجته فالموتر ويدعي

ان بوكه مسروق .


* ناس تلاحقك بموترها عسب تصب لهم

بترول .



صور كثيرة ..

مشاهد تضحك ..

ومشاهد تفجر الكبد ..



خلونا نتكلم عنهم بالتفصيل :




ماشي على وكل الله تبا تخلص أمورك فسنتر

من السناتر ..

لا لك ولا عليك ..

ما توعى الا وحده واقفه حذالك تصيح تبا بيزات عسب تشتري

حليب لعيالها ..

ولا تبا بيزات عسب تاكل ... أو تشتري ثياب لاهلها .




ولا وحده تصيح وتباغم وتراويك كراتين الدوا ..

يوم تقولها بشتري لج .. تتلون وتقولك انا بشتري بس عطني

هالمبلغ ..

وما يخلن حد من اهلهن الا يدعن انهم مرضى ( خافوا الله ) ...




وساعات تشوف واحد واقف جدامك شرات

الكبت وعنده خارطه مسجد او دور للايتام او

تحفيظ القرآن ويباك تتبرع عسب الاخ يطرش البيزات للبناء .




واليهال حدث ولا حرج ...

انته واقف تتشرا ما تحس الا شر يجرك من ثيابك ..

أثري واحد من اليهال يباك تعطيه ( 5 ) دراهم وفوق ما يبا

الدرهم ...




ويا حلاة الطلابة اذا يت وهي شاله شنطه

ماركه وتتدعي الفقر ..




ومنهم وقت العصر او عقب المغرب يدزون باب

الحوي ويدشون عليك المجلس أو الصالة

كأنهم حد من الجيران ...

وراعيه البيت تقهويهم وتاكلهم ويوم تسأل منو انتوا قالوا نحن نبا

شوية ثياب أو اكل أو مواعين !!!!!!!!!




والأدهى ان اصحاب السوابق فمهنة الطلابة

يطرشون تأشيرات زيارة للمقربين عسب

يعاونونهم ..

ومنهم من يتصيد مناطق معينه ..

ومنهم مراكز معينه ..




كله كوم اللي يراوغك من مكان لمكان ويوم

توقف موترك يقولك ابا بيزات بصب بترول

فموتري لاني ضيعت البوك او انسرق ....




أشكال تتكرر ..

وحافظينهم ..

ونعرف طرق تحايلهم ...




لكن ...

ثم ..

لكن ...




نحن ما نتعلم ..

وحجتنا هو شهر رمضان ..

شهر الخير والبركة ..

ونحن ندور عالأجر ..



يا ناس يا عالم ..

يا كثر الأسر المتعففة ..

اللي ما تمد يدها لهذا وذاك ...



ويا كثر الجمعيات الخيرية المنتشرة فالبلاد ..

وصلوا صدقاتكم وتبرعاتكم لجهات تستاهل هب هالحياله ..



نتمنى نشوف التعاون من الجماهير ...

عسب نقضي على هالظاهرة اللي تنتشر بزود كل سنة ..



والتحريات ورجال الأمن متعاونين ما بيقصرون ..

لكن نحن اللي مقصرين فحقنا وحق بلادنا ..

اللي نعطي هالناس الفرصة عسب يتفنون علينا بنصبهم ...




ويا اخواني ويا أخواتي :


المحتاج والمسكين ما بيحل عليه الفقر والعازه فشهر رمضان

بس ...




أتمنى رسالتي وصلت ..

واتمنى من الجميع التعاون ...


وجزاكم الله خير ...

والسموحة ...

مشكوووووووووووره على الموضوع الرائع

امـل الغــــد

شكرا اختي ع الموضو ع

امل الغد



العفو حبيبتي ..

وجودج الاروع ...

السلام عليكم

مبارك عليج الشهر اختي والجميع ..

..صدقتي اختي ...هالاشكال تظهر بكثرة في شهر رمضان ..

.. واذا قلتي له الله يعطيك ..قلب عليج ..وقالج ..الحين نحن في رمضان ..وانا محتاج ..وعقب يقولج ..اذا ما عطيتيني بدعي عليج ..!!؟؟؟..!

..والحين اكثر اللي يطرون ...ما ييونج بثياب مبهدله ...تييج وحده حاطه كل المكياج اللي عندها+ عباية مطرزة+شنطة من ماركات عوده = وتي تقولج ابا فلوس ..ابا اكل عيالي ..

..انزين يوم تبا تاكل عيالها ..ليش ما وفرت فلوس العباه والمكياج والشنط حق عيالها ؟..


..وعن نفسي ..انا من النوع اللي ما احب ارد احد..يعني اذا ياني حد اعطيه ..حتى لو كان ما يستاهل ...بس انصحه ..



..وبس ما بغي اطول عليج في الرد ..اتمنى وجهة نظري وصلت



فمان الكريم ..وتقبل الله صيامكم وطاعاتكم

رثام

علينـا وعليك

وهذا مانراه في شهر رمضان

ومشكور على الموضوع الرائع

نور البتول



العفو فديتج ...

^.^بنت زايد^.^



وعليكم السلام ورحمة الله وبركاته ...



الله يبارك فحياتج حبيبتي ..

نحن فديتج هذي مشكلتنا ..

ما نحب نرد حد ...

وهذا اللي خلاهم يتكاثرون ..

ومن ايام حطوا صور بعض المتسولين وياهم بعض اليهال ..

شي يعور القلب ..

خلونا لعبه يمثلون علينا بكم كلمه ودمعه ونحن نصدق ..


الله يعينا عليهم وعلى حيلتهم ...



تسلمين يا الغالية ...

هلاليه



العفو حبيبتي ..


وجودج الاروع ..