|
|
|
|
|
|
||
| إعلانات منتديات ألم الإمارات |
|
|
|||||||
| أرشيف المقهى أرشيف المقهى مجلس غير مخصص للمشاركات للإطلاع فقط . |
| كلمات البحث |
| من نبض قلبي |
|
|
LinkBack | أدوات الموضوع |
التقييم: 
|
طرق العرض |
08-17-2007, 01:49 AM
|
#21 | ||||
|
:: السفر والدراسة ::
السلام عليكم ورحمة الله وبركاته  صباحكم عسل وسكر ياحلوين  انا ابغى اطلع بره ابغى اروح بريطانيا – كندا – ايرلندا ...........الخ هل اصبح الابتعاث او الدراسة خارج حدود الوطن هدف حقيقي للدراسة والرقي والتفوق والتميز ام انها مجرد رغبة متاصلة في نفس الشاب ام انه يريد ان يكتشف العالم ويرى العالم الخارجي بعيدا عن حياته الراهنه ووطنه الأم ماراح اتكلم عن دراسة البنت خارج الدولة او الشاب لأن لكل شخص رايه الخاص فيه ووجهة نظره راح اتكلم عن الغربة اتحدى احد من اللي يبغوا السفر والدراسة في الخارج فكر في الغربه والبعد عن الاهل وشعور اهله عني شخصيا ما اتخيل فكرة ان اخوي يطلع بره المملكة احس بقشعريره في جسمي ما اتخيل اقوم من النوم اطلع اضحك ابكي امرض واخوي مو جنبي بعيد في مكان غريب لا اهل ولا احباب ولا ناس تخاف ربها الابتعاث والدراسة خارج حدود الدولة كانت رغبة أخوي الحقيقية ولكن بعد محاولات واقناع ومعارضة أمي وابوي اقتنع بصعوبة ولكن رجعت له نفس الفكرة لم انقبل في الهندسة وما انقبل في الطب لأنه يبغى الطب وحاليا نحاول ننقله لكلية الطب او يسجل في ابتعاث الملك عبد الله الداخلي واتمنى له التوفيق الخلاصة ... أخوي اختي فكروا لو شويه في البعد والغربة والديانه المختلفة والعالم الغريب ومشاعر اهلكم واحبابكم قبل ما تفكروا بانفسكم الدراسة في الدولة الام او في الخارج وحده اللي يبغى التفوق والتميز يلقاه في كل مكان فكروا صح وراح تعيشوا وتنجوا صح وتوصلوا صح لا تكونوا امعه فلان والا فلانه يدرسوا بره ليش احنا اقل منهم ممكن اللي يطلع ما يرجع وممكن ما يتوفق مايكمل لكن بين اهلك وفي بلدك مهما صار راح تلقى اللي يوقف جنبك ويساندك والاهم رضا الوالدين والله والصحى وطاعة الرب بعدها كل شي يهون ويتعوض ادري في ناس ماراح يعجبها كلامي وبتقول هذي تتفلسف او انها معقدة او انها تدرس وما همها احد تردد الكلام بس...... لكن الحقيقة غير كده انا ادرس في معهد مو جامعة كنت اقدر اطلب السفر وممكن القى قبول لكني فكرت بعقلانية بعيد عن الانانية لقيت اني راح استفيد شي واحد واخسر اشياء كثيرة في النهاية فكروا قبل ما تقرروا التفكير يوصل لنتائج ايجابية كثيرة اتمنى للجميع التوفيق في الدنيا والاخرة من نبض قلبي
 قلب الحب
|
||||
|
08-17-2007, 02:06 AM
|
#22 | ||||
|
::القنوات الفضائية والزواج::
السلام عليكم ورحمة الله وبركاته
يسعد لي ايامكم ربي  بكتب عن شيءقاهرني صراحة ورافع ضغطي القنوات الفضائية اصبحت منتشرة بشكل كبير وكل يوم نشوف قناة جديدة من كم يوم انفتحت قناة اسمها زفاف ونزلت عندنا بالصدفة طبيعة القناة ان ما خاب ظني انها تستقبل طلبات زواج من النساء والرجال وتعرضها ويتم حجز الرجل للمراة والعكس المهم والغريب وانا اشوف القناة شفت طلبات من شباب مابين عمر 20 الى 26 متزوجين ويطلبوا الزواج من ثانية  ويحطوا مواصفات يعني شي غريب عجيب شاب في بداية عمره دوبك متزوج وتبغى الثانية من فين تصرف وتاكل وتعدل والمصيبة الاكبر معظمهم يطلبوا زواج المسيار ويمدح نفسه وكانه نزل من الجنة وانه صادق ومقدر الحياه لو انك مقدر الحياة الزوجية ما طلبت الثانية وانت لسه صغير ويشترطوا تكون موظفة وحلوة و ...... من طلبات الشباب السعودي الموحدة (حلوة - طويلة - بيضة - شعرها ناعم طويل - دلوعة - طيبة خلوقة - رومنسية) من فين يلقوا هذي المواصفات ما ادري  لو كل واحد طالع في اخته كان فهم المقصود  وماطلب هالطلبات المعقدة اللي ما تتلقى الا في الاوروبيات والمشكلة الثانية واللي حيرتني هل اصبح الزواج للتسلية واللعب والتنقيه كل يوم وحده هل هي الا بضاعة او لعبة او سيارة او بدله مافي مسؤولية ولا حياة زوجية سليمة متوازنة ولا صبر كلها خداع الواحد صار يخاف من الزواج اذا الشاب في العشرين يبغى الثانيه اجل الشايب ايش يقول والله شي يقهر  الله يعين على الجاي ويرحم حالنا ويهدي البنات والشباب من نبض قلبي قلب الحب
|
||||
|
08-18-2007, 05:46 PM
|
#23 | ||||
|
::طلعة صباحية::
السلام عليكم ورحمة الله وبركاته مساء العسل والسكر مساء العود العنبر مساء الورد و الجوري يسعد مساكم ربي بعد آخر يومية كتبتها أو مدونة على قولة أخوي زايد كانت الساعة 02:06 AM بتوقيت الإمارات الحبيبة و 01:06 AM بتوقيت مملكتي الغالية رحت غرفة أخوي اللي كان طالع وجلست مع اخواتي نلعب بي البلاي ستيشن حق ولد خالتي كنا نلعب شريط (ميد نايت كلوب 3)<< كسل مافيني احول انجليزي كله سيارات وسباقات وانا في حياتي مالعبت عدمت السيارة ماخليت فيها شي صاحي  وطبعا البقية نفس الشي ماعدا اختي اللي رايحة اولى ثانوي احسن شويه وجلسنا نلعب كل ما اتبدلت السيارة بجديدة وحده تلعب يعني بالدور واصوات وضحك وتريقه وبسطه على الاخر الى الساعة 3ونص تقريبا جاء اخوي وغير لنا السيارات بسيارات قويه وكملنا لعب على الساعة اربع قال خلاص روحوا ناموا ابغى العب لحالي رحنا غرفتي اللي نام فيها مع بعض بس في الصيف قلت لهم ماحد ينام باقي على اذان الفجر 40 دقيقة جلست اقراء قران وهم جلسوا يلعبوا قبل الاذان بربع ساعه جاء ابوي من عند صاحبه وقال ايش رايكم نروح للبحر ماحد عارض انا بدلت البجامه اما اخواتي مارضوا قالوا احنا في السيارة وبعدين راح نلبس عبايات ما يحتاج انا غير ما ارتاح لبست جينز وبدي ابيض بكم طويل وشبشب( الله يكرمكم) ابيض وازرق وطلعنا ركبت ورى مالي خلق كل شوي ابوي يقول غطي عيونك لأنه اكثر شي يكرهه في الحياه ان البس النقاب واكشف عيوني وفجلست ورى احسن حتى لو كشفت عادي السيارة مظلله المهم وصلنا الحمراء القديمة قبل فندق الانتر بشويه كان في زفة عروس بالسيارة وربي شي جنان اول شي سيارة سوبر بان كلها شباب  متعصمين وطالعين من الشبابيك وبعضهم يرقصوا وفي النص سيارة العريس ومشرعة (مزينه) ووراهم سيارة واحد طالع من شباك الراكب يصور والبقية ورى واصوات البواري   والناس تتفرج مرة حلو بصراحة تعجبني هذي الاشياء تحسسك بمعنى الفرحبس ابوي مره عصب مايحب هذي الحركات ومشي بسرعة وصلنا قريب فندق الهيلتون وصلينا في مسجد التوحيد بعدها طلعنا كانت الزفة دوبها توصل والمسافة بعيدة بس لأنهم يمشوا على مهلهم الوقت كان مناسب وبس هذي اول شي عجبني بعدين رحنا للبحر اللي قدام تشكي تشيز الى ما طلع النور وشكل البحر يجنن من جد سبحان الله العظيم شي رائع ... بعدها اختي الصغيرة قالت جيعانه  مشينا واحنا في الطريق شفت سايرة عريس ثانية لونها اسود ومشرعة بتل ابيض و ورد احمر ماشاء الله مرة حلوة ما فيها الا العريس وعروسته واقفين عن البحر فرق بين اللي شفته في البداية وبين هذا ... بعدهارحنا للمطعم بس كان زحمة و مافي مكان لشبر رحنا الفرع الثاني وفطرنا وانبسطنا ورجعنا البيت على حوالي الساعة 7 ونص انا نمت الساعة 8 وقمت الساعة 3وبس هذي اللي عندي حبيت اقولكم وانصحكم انكم تجربوا روحة البحر الفجر مرة شي حلو و مميز من نبض قلبي قلب الحب
|
||||
|
08-18-2007, 05:58 PM
|
#24 | ||||
|
:: مشاهد من حياتي::
السلام عليكم ورحمة الله وبركاته
هلا وغلا بكل من يمر على يومياتي المشهد الأول أمس كنت في بيت ستي بعد المغرب مع اهلي جلست اتفرج تلفزيون مع اختي الصغيرة على ام بي سي 3 كان في فلم ويني الدبدوب احب هذي الشخصية كثير لأنه يذكرني بولد خالي الصغير وعجبتني كل الشخصيات ونفس القصة انهم عائلة وحده لنمور ويحاولوا يسعدوه بكل الطرق والرغبة في التعلم عند الكنغر ريو شي حلو بصراحة فلم مرة حلووووو حسيت نفسي طفله انصحكم انكم تشوفوه المشهد الثاني  نشوف في كثيرمن الافلام والمسلسلات اذا وحده انضربت كف تصرخ وتقلب الدنيا واني انجرحت وكرامتي ومدري ايش وما نصدق انا جربت هذا الشيء كنت ااكل ولد خالي الصغير عمره سنه تقريبا عض اصباعي بقوة صرخت من الالم وخاصمته ما القى الا كف على وجهي صح مو قوي بس مؤثر انصدمت ان خالي هو اللي ضربني الصراحة هو ما يقصد ياذيني او شي بس عشان صرخت في ولده من جد حسيت الاهانة والذل كف مرة وحده وخالي هذا غالي عندي وما ارضى عليه ولا على مرته وعياله بس صدمتي كانت كبيره لكن اعتذر ومرته زعلت قالت ما تنام عندي اذا ما اعتذرت لها طبعا تمزح انا مازعلت منه حسيت انه زعل على ولده بس مو لهذي الدرجة واللي صار كان غصب عني لأن اخس شي عندي احد يعضني المهم قام وسلم علي وخذني في حضنه قامت مرته تقول قلب الحب قومي عن زوجي احسلك انا اغار دفيته عني وهي تضحك وهو يرجع وكل شي عدى بسلامبس اللي حبيت اوصله اذا كنت تبغى تعلم احد او تادب تحكم باعصابك شويه العبره ممكن تكون بكلمة مو بكف لأنها اهانة كبيرة والله الله لا يذوقكممن نبض قلبي قلب الحب
|
||||
|
08-21-2007, 06:18 PM
|
#25 | ||||
|
::سبحان الله::
السلام عليكم ورحمة الله وبركاته سبحان الله الواحد مايأخذ الانصيبه والا ربي كاتبه يصير مهما كان أخوي يبغى يدرس طب باي طريقة وهو حاليا مقبول في كلية الهندسة جبنا له واسطة نقدر نقول قوية وما حوله للطب سجلت له في البعثة كان مطلوب جواز السفر وهو ما عنده راح وطلع الجواز بين يوم ليلة واسطات وروحة وجيه و طلع الجواز قبل دقايق بديت اسجل لكن الطلب ما اكتمل لأن درجته في الرياضيات اقل من المطلوب بدرجتين بس ومايقدر يطلع فسبحان الله الواحد مهما يحاول ويعترض ويرفض ما ياخذ الا نصيبه من نبض قلبي
قلب الحب
|
||||
|
08-23-2007, 06:00 PM
|
#26 | ||||
|
:: بنروح للحرم::
السلام عليكم ورحمة الله وبركاته لي فترة وخاطري اروح للحرم ابوي كل يوم جمعة ماشاء الله يروح من يومين وانا اقول لمامتي ابغى اروح كنا بنروح بداية الاسبوع بس روحنا للعيادة عشان ماما والاسبوع اللي راح معظمه كان في السوق لأني مامتي كانت مسويه عمليو من 7 شهور وما تقدر تمشي كثير فعشان هالسبب نروح كل يوم شويه ونحاول نخلص اغراض العيد لأن السوق في رمضان صعب نبغى نجلس في البيت نروح المسجد نرتاح لكن ان شاء الله بنروح بكرة للحرم من زمان مارحت والله احد يوصي شي انا في الخدمة من نبض قلبي
قلب الحب
|
||||
|
08-29-2007, 12:08 PM
|
#27 | ||||
|
:: بداية يوم غريبة ::
السلام عليكم ورحمة الله وبركاته صباح الورد والجوري يالله من زمان عن يومياتي قربت على الاسبوع  وراحت الصفحة الثانيةاليوم حاله خاصة نايمة متاخر وقايمة بدري ومانمت من التعب السبب الله يسلمكم نمت بعد اذان الفجر على طول المشكلة سمعت الاذن وقلت بقوم اصلي بس خلي اختي تطلع من الحمام مامداني اكمل كلام الا وانا نايمة  الله يلعن الشيطان اول مرة تصير لي هالحركة المهم قمت على الساعة 8 اخذت شور وصليت ولبست وقامت اختي اللي طالعة اولى ثانوي بنروح المدارس نشوف اسمها واسماء اخواتي الباقيات في أي مدرسه صاروا وقام اخوي وبدا المشوار صح ان المدارس قريبه بس الشمس حارة  راحنا اول شي الابتدائية وانا نازلة من السيارة انفك النقاب ويالله عبال عدلته ورحنا وخلصنا شغلنا بعدها رحنا للمتوسطة وانتهينا قلنا خلاص ماله داعي نروح الثانوي مدام انهم قالوا ان اختي خلاص مقبوله في المدرسة اللي تبغاها لكن ابوي اتصل وقال لا روحي تاكدي  ورحنا ونفس الحركة ينفك النقاب ياهي حوسه واخوي طبعا يعصب بس يسوي ماسك نفسه مدري اشفيه هالنقاب ما اروح مكان الا ينفك وخلصنا لف ورجعنا البيت بالسلامة والله فيني نوم بس مو قادرة انام ما اعرف انام هالوقت يا انام في الليل او بعد الظهر شكلي بنام الظهر بس ان اشاء الله ما تلعنا خرجة بدري مافيني اروح عند احدمن نبض قلبي
قلب الحب
|
||||
|
08-29-2007, 12:15 PM
|
#28 | ||||
|
:: زيارة الحرم ::
السلام عليكم ورحمة الله وبركاته مرحبا بكم ياهلا زي ما قلت لكم يوم الجمعة رحنا للحرم موسوينا عمره الحمد لله وكانت معنا ستي الله يعطيها الصحة والعافية ويطول بعمرها المهم قبل الطواف ابوي قال اللي يضيع ينتظر عن باب المسعى  اخوي قال تعبان وما اقدر امشي جلس مع الاغراض قلت لأختي الصغيرة عمرها 5 ونص تقريبا تجلس معاه مارضيت قالت لا بروح معاكِ مسكتها واخواتي الباقيات اثنين مسكوا بعض والاخيرة مسكت ستي وابوي مع امي مشينا وراء بعض المهم دخلنا وبدانا الطواف شوي وصار ابوي بعيد في الطرف وانا امشي مع اخواتي وستي لين وصلنا عند الكعبة دق الجوال ابوي يقول اطلعوا على الطرف لأن زحمة عند الكعبة قلت له طيب وعبال خلصت الا الكل اختفى وبقيت انا والصغيره شوي ما اشوف نفسي الا وسط رجال من كل مكان وربي مت رعب كل شوي اطلع على بره وما بقى واحد ماصقع فيني وانا بموت من الخوف كملت 3 اشواط واتصلت على اخوي عشان يجي يشيل الصغيرة الصراحة تعب وزحمة والحريم كل شوي حده تقول امسكي البنت انتبهي لها قلت اطلعها احسن وكملت لحالي ونفس الشي الرجال حولي من كل مكان واهلي مدري فين صرت امشي مع أي حرمه اشوفها من جد فشيلة لكن اكتشتفت اني اول وحده خلصت ورحنا المسعى في البداية مشيت براحة بعدين بدات اتعب وستي ربي يعافيها تمشي بسرعه اخواتي يعلقوا علي دحين من الكبيرة انتي والا هي بس والله ما اقدر على مشيهم في الأشواط الاخيره دخت 3 مرات  وفي صلاة المغرب الناس تسجد وانا راسي يطيح لحاله على الارض من جد تعبت بس كانت عمره حلوة ومن زمان مارحت الحرم الله يكتب لنا عمرة ثانية في رمضان وبس هذي كل الحكاية من نبض قلبي
قلب الحب
|
||||
|
08-29-2007, 12:23 PM
|
#29 | ||||
|
:: البنات والخدم ::
السلام عليكم ورحمة الله و بركاته حطيت هذا الرد ردا على موضوع كتبه اخوي الفاضل شوق العذارى في يومياته أول شي شوف اخوي لا تعتقد ان حطيت الموضوع لأن كلامك ما عجبني واني بجلس اضرب واحارب ابدا بس حبيت اوضح بعض الامور واحط تجارب معينة ولا وحده تقول هذي تدعي المثالية وبس تتكلم وتبغى تسوي مشاكل لأنكم راح تعرفوا ان كلامي صحيح في يوم من الايام .................................................. .................................................. ..... صحيح في هذا الزمن نادرا لما تشوف بنات يخدموا في البيوت حتى لو كان 100 وحده لكن في بنات هم اللي يشتغلوا في بيوتهم حتى لو عندهم بدل الخدامة اربع وهذا يعتمد على التربية لو تربوا ان كل وحده تخدم نفسها بنفسها ما شفنا هذي الاشكال والا اللي تتطلق وتبدا المشاكل من ثاني يوم زواجها بسبب انها ماتعرف حتى تغلي مويه وفي بنات ما يخدموا ابدا حتى لو مافي خدامة و اللي مفروض تسمى ام هي الخدامة وهم ياكلوا ويشربوا ويناموا وبس وهذي نماذج حقيقة الوحدة لو تعودت انها تساعد في البيت ولقت لها كم كلمة من امها و الا ابوها بتشتغل غصب والا طيب اقلها تتعلم امور البيت والطبخ والتنظيف والترتيب مو بس فالحة في تتعلم الموضه واللبس والمكياج وكيف تحافظ على البشرة والاظافر خلال السنة اللي راحت شفت اشكال والوان من البنات وحده تشوفها من جد تقدر تحتقرها من طريقة لبسها او حتى كلامها وتعرف ان ما منها خير وانها ما تربت كيف تبغاها تخدم مثل هذي الفئة محد يشرهه عليهم لأنهم عاشوا في رفاهيه من يوم طلعوا على وجه الارض و لا احد فكر فيهم وهم بالتالي مافكروا في هذي الامور تسمع وحده تقول لا انا اشتغل انا اشيل انا اغسل كانها بتسوي جريمة لكن لو قلت لها اطلعي المول امو روحي كوفي ما بتكمل الكلمة الا و هي طالعة بعطيك مثل واقعي خالي لم تزوج اخذ وحده مدلعة في بيت اهلها رغم انهم ناس عاديين لا بيتهم مليان خدم ولا حشم بس لأنها الصغيرة ما كانت تسوي شي ابدا هي تقول انا كنت في بيت اهلي ما اسوي شي كل يجي لين حدي لكن بعد الزواج تعبت وصارت بينهم مشاكل وتدخل الكبير والصغير وهو في بداية زواجه ما يقدر يحط لها خدامة رتبه ما يكفي الان صار لهم 5 سنوات متزوجين وعندهم طفلين حياتهم طيبة وبدون خدامة لكن بعد تعب يعني اللي مفروض تتعلمه في بيت اهلها تعلمته في بيت زوجها وهذا خطا ان البنت تعيش حياتها عند اهلها ما تعرف تسوي شي كانها ولد مثل ثاني انا شخصيا كنت اعتبر نفسي مدلعة من كنت صغيرة ما كان عندنا خدامة وامي هي اللي تخدم في البيت الى ماصار عمري 10 سنوات تقريبا او اقل جبنا خدامه ووحده تروح ووحده تجي الى قبل سنتين وشوي راحت الخدامة ما عاد جبنا الامكانيات ما تسمح والبيت كبير كل ما جات وحده قالت ما ابغى اشتغل لكن مع هذا كنت اعرف الشغل واعرف اسوي كل شي بس اشتغل كثير الان بعد ما صرنا لحالنا في البيت نحن 5 بنات انا اكبرهم واللي بعدي عمرها 16 واللي بعدها 12 واللي بعدها 10 واخر وحده 5 ونص وطبعا الولد ماله علاقة في الموضوع صرنا نشتغل في البيت شغل مو صاحي وامي ما يعجبها أي شي عشان اكون صادقة حتى امي تشتغل معنا "وطبعا الصغار بالاشياء اللي تناسب عمرهم ولوقت محدد في اليوم" نطبخ ونغسل صحون وملابس ونكوي ونكنس ونمسح ونرتب ونظف غرف وحمامات ونستقبل ضيوف وكل شي صح تعبنا راح من صحتنا وراحت ايام النعومة والدلع والايادي الناعمة لكن بالتعود كل شي يصير وشغل البيت متعب بس حلو بالذات لو كان مرتب وفي مواعيد لكل شي وتعاون وحاليا نحن في غنى عن الخدامة وكل من يجي يقول بيتكم احسن بدون خدامة حتى انه انظف وارتب وهالشي يعطينا دافع ونحس بالفخر اننا قادرين على رعاية بيتنا وابوي يفتخؤ ان بناته يشتغلوا في البيت وامي نفس الشي مع انها تقول اننا متعبين احيانا  اخر شي لا احد يتوقع انه يلقى مثل ايام الاسود والابيض والا وحده مثل جدته حتى لو في فهذا في النادر وعدد قليل وفيهم الخير والبركة ... وانصح كل بنت تقرا كلامي انا تحاول على الاقل تنظف غرفتها بنفسها بعدين تبدا بالاشياء الثانية مثل تغسل شي من ملابسها وتكويها وترتب تغسل صحون لو مرة وحده في الاسبوع بتحس بقيمة النعمة وتعرف كيف تخدم نفسها لو صار لها شي في نقطة مهمة ذكرها اخوي في موضوعه الخدامة وطريقة معاملتها هذا الشي يختلف من بيت لبيت ومن تربية لتربية الوحدة لوتربت صح ما تجرات على احد حتى لو كانت الخدامة اوعرفت من كان نبيها ورسولها وطريقة معاملته للخدم ماسوت اللي سوته وبس احس اني كتبت كثير واصابيعي وجعتني  من نبض قلبي قلب الحب
|
||||
|
08-30-2007, 07:11 PM
|
#30 | ||||
|
::منوعات::
السلام عليكم ورحمة الله وبركاته مساء الورد والجوري كيف الحال والاحوال مدري ايش فيني اليوم السخونة ذابحتني من امس المشكلة انها سخونة داخيله احس عيوني وارمة ومو قادرة اشوف تمام وجسمي كله متكسر قمت من النوم ورجعت نمت بعد ساعة الغرفة كانها فريزر وانا مو متغطية اخوي دخل يقول اشبك قلب الحب تعبانة وليش مو متغطية وانا مو قاردة اتكلم بس قلت له خليني بنام راح جاب لي بطانية وخلاها على طرف السرير قال اذا احجتيها هذي عندك بس نمت بدونها والمكيف نازل علي والغريب ما حسيت بالبرد قمت بعد 3 ساعات قالي اجيبك دواء قلت لها ما يحتاج بس باخذ لي شور خلصت والقى الكل لابس اقولهم على فين قالوا رايحين بيت ستي بس اخوي راح مع ابوي يشتري لاب توب عشان الجامعة وبعدين بنروح احس نفسي دايخة لكن الله يعين قبل شوي شفت يوميات اخوي شوق العذارى ويوميات اختي الروح بصراحة شوق ماكذب وصادق في كل اللي قاله بعطيكم مثال بنت ايش كبرها يعني عمرعا 20 او شيء تروح الجامعة مع الخدامة بتقول عشان السواق ماشاء الله لأن همها الدين والادب لبست ذيك العباية حقت العرس ما عندي اقوله زيادة شوق والروح ما قصروا وما خلوا شي نقولهاحس البنات راح ينقلبوا علي ويكرهوني بس والله انه صدق اللي يصير هالايام شي مو طبيعي وحده اعرفها هي صحبتي واصغر اخواتها ودلوعة امها كنا في مؤتمر في فندق مع المدرسة ونزلنا نتغدى في المطعم واحنا جالسين جنب الطاولة حقتنا في طاولة السيرفس صحبتي هذي تبغى مصاص عشان تشرب السفن قامت تنادي على وحده من العاملات قلت فلانة ليش هذي الطاولة جنبك خذي منها تقول خليني احلل الـ800 ريال هذا واحنا مادفعنا شي لأننا مشاركات اختها كانت معنا قالت انتي لو تزوجتي ايش راح تسوي قالت بزف الخدامة قدامي طبعا هي تمزح بس هذي حقيقة كثير بنات لو ما تحط اي شرط على العريس بس اهم شي الشغالة بصراحة انا اشوف البيت بدون خدامة احسن وافضل واريح والبنت لو تخدم نفسها بنفسها يكون احسن اخر شي مرة كنت اشوف التلفزيون في وحده كاتبه في الشريط اللي ينعرض على الشاشة وتطلب المساعدة تقول زوجي زعلان مني يقول ايش هذي ما تسوي شي كاني اخذ لي عازب موبنت الفطور من بره والغداء والعشاء نفس الشي والملابس تنغسل بره بالله هذي لأي سبب زوجوها في امثلة ثانية بس خلاص بكتفي والله يهدي الجميع من نبض قلبي
قلب الحب
|
||||
| العلامات المرجعية |
| عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف) | |
| أدوات الموضوع | |
| طرق العرض | تقييم هذا الموضوع |
|
|
العرض العادي
