DrouP ME a LiNe

حورية عمان

DrouP ME a LiNe

.. أكتب لي سطرا ..

يكتب الإنسان عبارات لا معنى لها .. و يكتب سطرا معناه الكثير ..


..



أتمنى أنكم تستمتعون مع يومياتي ,,

حورية ..

حورية عمان

.........

جميل أن نبدأ دائما بذكر الله ..

بسم الله الرحمن الرحيم ...

بـسمـ جــامـع قـلـوبــ المحبــينــ ,,

هذه بدايتي معكمـ ..




اسمي : حورية عمان (و افتخر)

عمري : 18 سنة

المرحلة الدراسية : طالبة في المرحلة الثانوية .. آخر سنة في المدرسة
و ابي أدرس هندسة معمارية (ادعو لي)

بلادي : سلطنة عمان و أعيش في العاصمة : مسقط العامرة

ألواني المفضلة : الأحمر & الأسود

هواياتي : الكتابه ، النقش ، الخط العربي ، الطبخ ... صراااحة وايد هوايات

شخصيتي : اجتماعية ، حبوبة كل حد يحبني أول ما يشوفني .. المهم .. ، أحب الأطفال لكن يعصبووووني واااايد ، دلوعه ,, و محد يلومني لأني أول طفلة في العايلة .. مستقلة في أغراضي الشخصية ,, أحس انها ممتلكاتي و ما ارضى أحد يمسكها ..
عندي علاقة خاصة مع أغراضي الشخصية أحس ان كل شي له ميزة و غلا في قلبـ ي ,,

و الحين أقولكم ..
لأن وراي مذاكرة .. و إن شا ء الله أشوفكم الليلة ..

بباي ..

حورية

حورية عمان

مرحبا يا جماعة الخير ..

الصراحة .. و مع اني واايد تعبانه إلا اني قررت إني ما أرقد قبل ما اخبركم عن أول يومياتي وياكم ..

اليوم 4/6 ..
.. نشيت الفجر .. غسلت و صليت .. و ما نمت إلا لما قومت خواتي للمدرسة لأن عندهم امتحانات ..

المهم و كالعادة قمت الصبح .. على الساعه 10 و نص عشان أبدي أذاكر و كنت ناهضة متأخر و حاسة بكسل بسبب الظروف الصعبة إلي واجهتنا البارحة .. خالتي كانت بالمستشفى و انا و أمي و ابوي و بنتها كنا وياها ..ردينا البيت ساعه 4 الفجر

و اليوم بديت بمادة الرياضيات ..

رحت و اتريقت الوجبة كانت خفيفة .. خبز و جبن و كوب عصير ..

بديت أذااااكر و مسألة ورا مسأله .. إلى ما أذن الظهر .. سرت و صليت و من بعدها اتغديت و سحبتها مذاكرة من جديد .. مثل ما يقولون صايرة دودة الكتب بس عشان أخلص و ارتاح ..

و من صار المغرب .. تركت الكتب و اتصلت بصديقتي إلي صار لنا مدة ما رمسنا ويا بعض ...

و سحبتنا الرمسة إلى الساعه 9 .. و حنا ما منتبهين ..

دخلت الماما غرفتي و هي تصارخ : إنتي ما بسج تسولفين في التلفون ؟؟ نحسبج يالسة تذاكرين ..
قلت لها : يالسة أرمس ربيعتي و الحين بسكر ..
قالت لي : لازم نروح بيت جدج العود ..
قلت لها : ماما .. ما أبي أسير ..
قالت لي : لازم نسير .. يلا قومي بدلي و أترياج تحت في الصاله ..

قمت و بدلت و اتعدلت و طلعنا ..

يلسنا ويا الأهل .. رمسة و سوالف بعد العشاء .. إلى الساعه 12 ... و بعدها طلعنا رحنا ناكل أيس كريم .. وااااو يمي ..كان بارد و لذيذ ..

إتذكرتكم وانا آكل .. قلت حج عمتي .. بسير البيت و بخبر اعضاء المنتدى أني أكلت أيس كريم .. قامت تضحك علي .. مو مصدقة .. طنشتها .. و كملت أكلــ ي ...

و عقبها رديت البيت .. و جلست على النت و دشيت المنتدى و سجلت يومياتي في يوميات الاعضاء ..


هذا كل الي صار ..

يلا يا جماعه .. تصبحووووون على خير ..


إلى لقاء آخر إن شاء الله ..

بباي

حورية

حورية عمان

...
مرحبا من جديد ..

شخباركم ..

وحشتوني وااايد ..

اليوم بخبركم آخر الأحداث إلي استوت وياي ..





بسم الله الرحمن الرحيم ..


اليوم / الخميس
التاريخ / 5/6 ..

اليوم نشيت متأخر شوي ... لأن البارح كنت سهرانه على التلفزيون و على المنتدى ..

بديت يومي بشكل روتيني ..

بديته بالصلاة و المذاكرة .. و اليوم الله يسلمكم ذاكرة مادة : الثقافة الإسلامية ..

بيني و بينكم هالمادة ما وايد دسمة .. لكن فيها كلام وااااايد .. و الحمدلله إني كنت أحضر يوم بيوم .. عسب جذي كانت المذاكرة حلوة و سهلة ..

حفظت الآيات والأحاديث .. و حفظت الأشياء المهمة ..

كنت يالسة يلسة وحدة .. من صلاة الظهر إلى صلاة المغرب .. و من خلصت و صليت .. سمعت خبر .. هذا الخبر كان مثل الصاعقة الي نزلت من السماء و على راسي مباشرة .. و ذكرني بسااالفة تجرح وااايد .. حسيت إن الدنيا تدوووور في راسي و اتمنيت حد يقول لي إني نايمه و أحلم كااابوس و بقوم منه ..

لكن للأسف .. هذي حقيقة .. و حقيقة مرة ..

إختي و رفيجتي و للأسف متربين من وحنا صغار .. اتخطبت اليوم .. .. لكن بدون حتى ما تفكر إنها تخبرني أو تعزمني .. الكل كان متوقع إني بحقد عليها لما أعرف لأسباب عائلية .. ما يحتاج أذكرها .. لكن والله من دريت فرحت لها و في نفس الوقت حزنت لأنها ما سوت لي أي اعتبار ..

عموما .. الله يعنيها و يسعدها .. و بيني و بينكم .. لحد الحين حتى بعد ما تمت الخطبة رسمي ما دقت علي .. و لا خبرتني .. و انا قررت إني ما أتصل فيها ولا أبارك لها .. لأني زعلانه وااايد منها ..

.. حاولت إني أنسى الموقف .. و انسى السالفة كلها ..

دقيت على ربيعتي و يلست أسوالف وياها عسب انسى شوي !! لكن ما أخبي عليكـ م .. ما نسيت .. بالعكس بعد ما صكرت وياها .. دارت كل الذكريات في راسي ..

اخيلوا .. أنا و هي كنا رفيجاااااات وااايد ,, غير أن نحن أهل و علاقتنا وايد حميمة .. لكن الزمن غدااار ,, الله يسامحها ..

كانت طلعاتنا ويا بعض و روحاتنا ويا بعض .. روحنا كانت وحدة .. آآآه .. كل ما اتذكر والله أتضايق ..

المهم .. لا تشغلوا بالكم ..

بنسى السالفة ويا الأيام ..

الحلو إن بنت خالتي يت عندنا البيت .. هي أصغر مني بسنه ..

رحنا المطبخ و سوينا بيتزا للعشاء .. يمي كانت لذيذة ..

و بعد العشاء .. صعدت فوق.. و يلست على الكمبيوتر .. و كتبت لكم آخر يومياتي ..

أتنمى انكم تقرونها .. و تستمتعوا في قرايتها ..



حورية ..

حورية عمان

....

اقولكم شي ..

كنت يالسة أتصفح يوميات الأعضاء ..

اكتشفت شي .. و انا كا على بالي شي ثاني ..

بس لا تضحكوووون علي ,,



انا كنت متوقعه إني لازم أكتب يومياتي مرة وحدة باليوم و بس ..

لكن اكتشفت إني أقدر أكتبها بأي وقت ..

يعني أقدر أكتبها في اليوم أكثر من مرة ..

ههههههههه ..

يلا ,, انا تعبت و لازم اسييير أنام عشان بكرا ورااااي مذاكرة من الصبح ..

تصبحون ع خير ..

باي .

بشتاق لكم إلى بكرا ..


ادعو لي ..

حورية عمان

....

مرحبا ..

كيفكن يا حلوييين ..

الصراحة ما جا لي نوم ..

حاولت وااايد لكن .. ما بدون فايدة ..

المهم ..

رحت أجلس ويا أهلي بالصاله ... و كلنا جالسين نشوف تلفزيون ..

برنامج العائلة .. مسلسل نور ..

كل الي في البيت يشوفونه .. و الأحداااث بادية تسخن أكثر و أكثر ..

أكيد أكثر الناس يشوفونه ..

الأحداث صايرة وااايد تزعل ..

أخذو الشباب على الحبس و خلوا البنات كلهم في البيت بروووحهم ..

شي يزعل ....

حورية عمان

..

مرحبا ..

عودة جديد من سلطنة عمان دار العزة و الكرم .. و معكم من جديد .. / حورية عمان .. ..

شخباااركم ..

البارحه و بعد ما شفت المسلسل

.. رحت داري ..

قررت إني أذاكر شوي .. إلى ما أحس برجاد ..

و انا أذاكر و منهمكة و جالسة أحفظ و أحفظ ..

سمعت صوت من ورا الباب ..

الصراحة خفت .. و حسيت قلبي طاح بين ريولي ..

قلت في نفسي .. من يا ترى بيكون عند الباب بالهوقت وكانت الساعه 2 و نص ..

و كنت أكلم نفسي .. أروح أبطل الباب و الي يصير يصير !!!






شو تتوقعون ؟؟؟؟




__________________________________________________ __






.................................................. .................................................. ..







خلااااص بخبركم ..


هههههههههههههههههههههههههههههههههههههههههههههههههه ههههههه

كان أخوي الصغير نايم عن باب الحجرة ..

حبيبي .. والله عور لي قلبي .. و انكسر خاطري عليه ..

قومته ..

انا / حبيبي ليش راقد هني ؟؟
أخوي / عشان إنتي رحتي و رقدتيني عندج ..

رفعته من على الأرض و لميته في حضني ,, و بسته ,, و حطيته على الكرفاية ..

كان شكله مثل الملاك الصغير ..

اخوي من النوع اذا اتعلق في حد وايد صعب يفارقه ..

يعني .. أنا قبل ما أبدأ أيام مذاكرتي كنت فاضية .. فأرقده و أنا أرقد معاه .. لكن ايام المذاكرة ما أرقد بسرعه عسب أيلس أذاكر ..

المهم ..

هو رقد و أنا سرت أكمل مذاكرتي ..

على الساعه 3 و نص .. سرت نمت .. و الكتاب بحضني ..


_____________________

الصبح .. الساعه 10 .. دق المنبه ..

قمت بكسل .. اليوم جمعه و الناس ما تقوم مبكر ..

قمت اغتسلت و سرت على كتبي من جديد ..

أففف نفس الروتين الملل ..

صار وقت الصلاه .. قمت أخذت بريك .. و يلست على المنتدى ..

و صار شي خلاني أنزعج وااايد ..

الظاهر إن أحد من المشرفين أو الإدراة .. لاغي موضوعي (وقع و لو بكلمه) و انا ما أدري شو أسوي .. ما أقدر أرسل رساله خاصة لأن مشاركاتي أقل من 100 مشاركة و حطيت موضوع ثاني (لو سمحتوا مساعده) و هم محد عبرني ,,


مو مشكلة ..

الحين أنا بسير أتغدى .. لأني جعت وااايد ..

حياكم البيت بيتكم إذا تبون تتغدون ويانا ..


يلا برب ..

أشوفكم وقت ثاني ...


مع السلامه يا حلوين ..

حورية عمان

مرحبا مليووون ..

اشتقتوا لي ؟؟؟

أنا اشتقت لكم ..

هههه

البارحة ما دخلت المنتدى لأني كنت تعبانه شوي .. و سرت رقدت مبكر ...

الصبح . نشيت من رقادي فجأة شفت الساعه كانت 7 و ربع..

لا تضحكوا علي .. قمت من نومي
لأن المكيف كان مسكر .. و كنت حااسة بحر ...

أفف أخس شي لما الواحد يكون نايم و يسكرون عنه المكيف .. و يحس إن الدنيا حر و الواحد متخيس من العرق !!

قمت من على سريري.. فتحت المكيف و سرت أرقد مرة ثانية ..
لكن ما قدرت أنام .. قلت بقوم أسبح و أذاكر ..

خلصت على الساعه 8 إلا ربع .. و اول ما بطلت الكتاب حسيت نفسي نعسااااااانه حييييل ..

عقيت عمري على السرير و رحت بسااابع نومه ..

اليوم قمت الساعه 11 .. وااايد اتأخرت في الرقاااد ..

نشيت بسرعه .. و بديت أدرس ..

... و اشتغل الروتيييين الململ اليومي ...

لكن الساعه 6 و نص المغرب .. سمعت صوت صراخ .. افزعت من مكاني و سرت صوب الصوت .. أثاري الأهل كلهم متجمعين قدام التلفزيزن و يشوفون مباراة عمان و يابان ..

خلصت المباراة .. و خلص الشوطين على التعادل ..

لكن في شوط إضافي .. و انا ما أبي أسير أشوف لكن وراي مذاكرة ..

...........................

هذا كل الي صار اليوم ..

و بدأ العد التنازلي للإمتحانات ..

عندنا الإمتحانات تبدأ من بكرا .. لكن انا عندي أول امتحان يوم الثلاثاء ..

ادعولي ...

بباي ..

حورية عمان

..مساكم الله بالنور و السرور ..



************************************************** ****************

موج البحر هائج ..
و مخلوقات البحر خائفه ..
ما به البحر هائج هذا المساء ..
أيعقل أنه غاااضب !!!

************************************************** ******************

اليوم أنا وااايد تعبانه .. و متضااايقة ... و حاسة إني بنهااااااار بأي وقت ..
************************************************** *******************

...

مـــا عــاد ينفـ ع لو تعــــذرت ,,
و رجـــعت ,,
فـات الأوانــــ و قل قدرك و شـــــانكــ

و شلـــونــ اســامع و انت في الود قصـــرت ..

و بعت الرفيق اللي وفالك و صــــانكــ .......

و الحين جاي تقول نادم ..
و فكــــــــــرتــ

خل الـــمحبه و انتـــ خلـك مكـــــــانك ,,

************************************************** **********************

حااااااسه بإحباط فضيييع ...

أبي أصيح .. لكن ما ادري وين أروح و لمن أشكي حالي ..


الشكوى لغير الله مذلة ..


....

يمكن أرجع وقت ثاني ..

ادعوا لي ..

حورية عمان

مساكم الله بالنور يا حلوين !!



أولا / الحمدلله على سلامة منتدانا الغالي .. و الله انا عن نفسي .. افتقدت المنتدى واايد ..

ثانيا / و الي انا خاااااااايفة منه حيييييييييييل .. إنــ بكرا أول امتحان ..

...

ادعولي .. لأني خااايفة موووووووت ...

..


بكرا لما أرد من الإمتحان أكيد بخبركم شو سويت بالإمتحان ...


دعواتكم من خالص قلوبكم ...


حورية ..