حيــاتي فــي ورقة

خويت الشوق · 06-26-2008, 02:56 PM

الــسلام علييــكم ورحمة الله وبركاااته.. الصرااحه خاطري اكتب يوميااتي من زمااان .. بس اترددت واايد.. ويتني القوه اليوووم هع هع

بعرفكم على شري يميزني (اللي هي انا طبعا) ..
شري يميزني انسانه اتحب السلام وما تحب المشااكل ابد.. بتسألوني ليش نكي شري يميزني .. الله يهداها ربيعتيه قالتلي هالاسم يليق عليج (كلن يرا الناس بعين طبعه هههه) وعيبني الاسم وكتبته .. وصاار نكي الحين شري يميزني والكل يخاف من هالنك ويقولون الله يستر لوول

انا ادرس في جامعة الامارات وخذت كلية الهندسة.. تبوون بعد ال ID لوول .. ؟؟؟؟

المهم.. هواياتي .. اممم تقدروون اتقولون كتابة الاشعار وقرأة القصايد.. واحب اسمع مشاكل النااس عسب اصلح بين من بينهم .... ملصحه اجتماعيه

عيوووبي .. الطيييبه الزاايده ... والعصبية احيانا

الشي اللي اكرهه يووم الواحد يحط ضيقته عليييه .. اووففف احس انه مليون الف شيطان راكب ع راسي هالوقت ..

الشي اللي احبه .. السلام مثل ما قلتلكم ..

الأكله المفضله عندي .. fast food or junk food.. ما احب شي اسمع سمج .. يمكن السمج الصافي بسسس لوول

اللألوان المفضلة .. الفوشي + الازرق الفاتح + البنفجسي الفاتح

والاشياااء الباااقيه ان شاءالله بتعرفونها مع الاياااام

لي عوودة جديييدة بأذن الله

خويت الشوق · 07-01-2008, 08:32 PM

السلام عليييكم شحااالكم .. اتأخرت وااايد ادري .. بس شو نقدر انسوي يوم انه عندنا ظرووف؟؟؟

أنا حاليا فالصاله بيت يدوتي.. تواها الصااله كانت مترووسه بنات وحريييم .. بس فجأه بحححح .. مافي حد .. والصرااحه الصرااحه .. بعد الربشه الحلوه والتجمع الحلو .. تضربك ضيجه لانه الناس واليمعه اختفوا وماشي غير صوت التلفزيوون يرن في اذنك .. تحس عمرك ضايع يوم انه مافي حد موجود وياك .. وخاصه يوم انك متضايق وتبا تغيير جو بأي طريقه وغيرته .. وبعدين يرد كل شي نفس قبل والروتين القبلي .. شو بتسوي ذيك الساعه .. اااخ بس ..
انا جي احس .. احس بضيجه احس بالوحده .. ما عندي شي اقدر اسوويه .. بس بحاول اني اغيير المود ..

كنت راقده اليوم ع اذان الفير بعدين رقدت ونشيت على اذان الظهر .. ويوم نشيت احس عمري فرش .. لانه اليوم اللي قبله راقده بس 4 ساعات ..
كنت راقده في حجرة اختيه في بيت يدوتي .. انا وخالوتي عمرها 20 وبنتين يقربولنا .. يعني تقدرون اتقولون نفس السن ..
طبعا انا نشيييت بعد موووت .. لانه البنات يالسات يلعوزنّي .. بعدين نشيت فرش .. غسلت ويههي وصليييت صلاتي .. وتلبسنا واتكشخنا .. ويينا تحت .. عند يدوتي وخالوتي الثنتيين الكبار .. وقعدنا نلعب مع بنت خالوتي الصغيره (خالوتي قبل 11 يوم مربيه) ..
المهم تغدينا وخلاف نشينا وسوينا حلقه .. ولعبنا ورقه .. وحشره وسوالف وضحك .. وبعد فتره .. كل شي رااح ..
وقلت بفتح اللاب وبكتب شووي .. يمكن انتوا اتونسووني بردودكم =) ..

يلا اجوفكم على خير ان شاءالله .. ادري انه مافي شي يدييد .. بس تعرفون روتين وجي .. وان شاءالله بقولكم كل شي بوقته وبقولكم واايد سوالف

فمان الله

خويت الشوق · 07-03-2008, 03:41 PM

ع الساعه 1 الظهر .. فتحت عيوني وانا احاول امنع الضوء يدخل عيوني .. تمددت وانا احس بكسل فضيييع .. حاولت كذا مره اني ارقد بس ما قدرت

تميت اتجلب واتجلب الين ما خالوتي اللي عمرها 21 سنه حست فيني جان اتنش .. ابتسمتلها بكسل وقلتلها

صباااح الخيير ..
قالتلي صبااح النوور

عقب رديت اتجلب وعطيتها ظهري وتميت العب بالتليفون .. واتعبثبه .. الين ما اتصلت في ربيعتيه وتميت اسولف وياها وانا بعدني ع الشبريه ..

نشت خالوتي وصلت .. وانا بعدني اسولف .. بعدين حسيت اني واايد سولفت ..
خلاف سرت الحمااام وانتوا بكرامه .. يلست اتغسل وبعدين اتمسح .. وخلاف تلبست وصليت ..
ويووودت ولد خالي عمره سنتين ونص .. تميت العب ويااه ..

جان اجوف شنطة امه .. فتحت الشنطة واتعبثت الين ما حصلت رووج .. جان احطله رووج ههه وطلع واايد كيوووت .. وهو عاد مستانس الحبييب المهم .. بسته وخليته عند امه .. وخلاف نزلت تحت .. وفالصاله جفت يدوه وخالوتي الكبيره رقود.. قلت (شو السالفه)

عقب سرت حجرة يدوه جفت خالوتي اللي مربيه وبنتها تميت الاعب البنوته .. وصورتها .. ولعوزتها .. الين ما طردتني خالوتي عسب اترضعها ..

خلاااف شليت الكيمرا وسيفت الصور ع اللاب .. وتميت العب فالصور بالفوتوشوب الين ما لاعت جبدي ..

وقلت بفتح المنتدى وبكتب ..

الغدا جدااامي .. والاهل ياكلوون اللا انا .. ومحتشرييين عليه هههه

يلا خلوني اسير الحين .... فمااان الله

خويت الشوق · 07-06-2008, 02:55 PM

فليييل كنت مصدعه .. كنت راده من بيت يدوتي من بعد ما يلست عندهم 10 ايام .. خذنا درب اكثر من 4 ساعات.. الصرااحه كااان زحمه.. اممم ع فكره بيت يدوتي في ام القيوين ..

المهم يت البيت وانا متشققه اني بجوف امايه اللي تولهت عليهااا.. اول ما وصلت البيت احتشرررت وتميييت اصارخ.. وسرت عند امي وحببتهااا ولويت عليها بالقو.. وهي اونها معصبه عليه

جان اتقولي: ما بغيتي اتييين .. هب جنه عندج ام تسألين عنها

قلتلها: افا يامايه منو كل يوم يدقلج ويتخبر عنج

جان اتطنش وانا تميت احببها وحبيت ريلهااا بعد جان اتقوول : لا تحبين حرام

قلتلها: انتي امايه وكيفي ابوسج وين ما ابا

المهم وسرت عند اختيه الكبيره وحطيت ايدي ع بطنها اجووف بطنها اذا نازل ولا لاء.. لانها حامل,, شكلها بتربي هاليوميين هههه

تميييت اسولف وياهم وجي واتعشى وخلاف جفت نوور الين ما الكل تيسر لحجرته اللا انا .. تميت واااعيه اركب puzzles 500 قطعه.. والحمدلله بقالي شوي وبخلص وببروزه

خلااف تعبت من كثر اليلسه .. جان انش واسير فوق وارقد في الحجره وقبل لا ارقد يت ربيتعيه ع بالي... جان ادقلها وتقريبا كلمتها حوالي ساعه...

بعدين رققققدت من الخاطر الين الحييين ...

وهــــذا اللي صااار وبـــــس

خويت الشوق · 07-09-2008, 09:53 PM

نشيت من الغبشه .. مع اني كنت راقده الساعه 4 الفير..

نشيت ع صوت التليفون.. كانت ربيعتيه اتدقلي لاني وصيتها اتدقلي واتوعيني الصبح بسبت انه عندي شغله فالشارجه

نشيت وكلمتها وانا دهمانه وراسي يعورني وهب مركزه في كلامها.. بس حاولت اضبط عمري واستوعب.. وهي بندت لانها ما تروم اتطول

جان ارد احط راسي ع المخده واجوف الصقف وابندت عيوني ورديت ارقد وما حسيت اللا ببوسه خفيفه ع خدي جان انش.. افتح عيوني شوي شوي جان اجووف ويهه طفولي وايدين طفوليه

نشيت وشليتها وخليتها ع الشبريه.. وتميت الاعبها.. وهي كانت دهمانه مثلي جان ابوسها الين ما تعبت وضربتني ضربه خفيفه ع راسي وقالتلي (يلا نشي ماما تباج)

طبعا هي اختيه الصغيره اخر العنقود عمرها 5 سنوات ..

قلتلها: (ياسلااام)
قالت: (يا مدام) وظهرت السانها وطلعت من الحجره

ضحكت عليها ونشيت اتغسلت جان اجوف الساعه لقيتها الساعه 8 ونص .. قلت في خاطري (عسى ان تكرهوا شيئا وهو خيرا لكم)

سرت تلبست وسيده سرت عند امايه بست راسهااا وتميت اسولف وياها.. الين ما سرنا الشارجه انا وهي بس عسب اغير الجامعه

الصرااحه انا كنت مسجله في جامعة الشارجه قبل .. بس حدرت جامعة الامارات.. مع اني حصلت منحا.. بس ما ادري شو اللي وداني جامعة الامارات .. المهم انقبلت فالجامعه وكل شي.. بس ما اقتنعت فالجامعه وسرت جامعة الامارات ..

بس اتندمت لاني ما اريدها .. حسيت بغصه وضيقه هناك وحسيت اني مستحيل اييب علامات عاليه والمعدل التراكمي يالس يقل بسبت البيئة اللي هناك .. البيئة اللي هناك ما تساعدني على اني ادرس

المهم سوينا كل الاجراءات .. اللا شي واحد .. اريد ارد المنحا مره ثانيه.. وان شاءالله اذا الله راد يردون يعطوني اياها

المهم سوينا الاجراءات وطبعا كله تعب في تعب اااخ.. وحررررررررر.. من مبنى لمبنى.. وماشاءالله ع الوالده تمشي بسرعه وانا ما اروووم.. طبعا الوالده ثقافتها انجليزيه هههه.. ماشاءالله عليها اشطر عني..

خلصنا اجراءاتنا الساعه 2 بالضبط بعد مووت.. بس نتريا المنحا "ادعوووولي"

المهم ظهرنا من الجامعه وسرنا هوم ار اس.. تعرفون سوالف البيت وجي وعاد الوالده عندي.. يعني لا تلوموني اذا جفتوني مطنقره ومعصبه ومالي خلق اللا حق الرقاد

دقيت ع ربيعتيه وانا هناك وسولفت وياها الين ما خلصت الوالده.. ركبنا السياره وسرنا صوب شقة ريل اختيه واتغدينا هناك.. وسولفنا وياه وخذت منه كم من فلم عسب اسهررر عليهم.. حسيت بصداااع جان ما القى عمري اللا وانا سايره الحجر وحطيت راسي ع المخده عسب احس اني متوازنه ودقيت ع ربيعتيه وسولفت وياها الين ما حسيت اني ابا ارقد جان ابند عنها "وخششششششششش" رقدت

نشيت ع صوت الفون وكانت ربيعتيه.. ابتسمت ومارديت ورديت ارقد مره ثانيه وع الساعه 5 ونص نشيت بصوت الوالده تزقرني واتقولي نشي عن نتأخر الين ما نرد بوظبي.. نشيت بثقل وانا متضاايقه ابا اررررررقد.. ما نطقت بكلمه وسرت الحماام واتغسلت ويههي منتفخ "عفانا الله"

قعدت فالصاله.. جان يتطنز عليه ريل اختيه.. وجفته من فوق الين تحت وضحك عليه اخر شي وابتسمت.. صبلي جاهي

قلتله: (لالا ما اريد.. ابا ريد بول) جان يرن تليفوني وربيعتيه دقت

رديت عليها سيده وسولفت وياها.. وقلتلها: (برد ارمسج)

طبعا مستويه سالفه بيني انا وهي وربيعتها.. المهم انا اتنرفزت من اسلوب ربيعتها واايد وقهرتني بس طنشت الموضوع

المهم ماعلينا شليت الاغراض وسرت الدكان اشتريت ريدبول ودبة ماي وركبت السياره واتوكلنا على الله.... وطبعا طول الوقت سوالف مع الواالده وشوي اترمس اختيه وانا ارمس ربيعتيه.. الين ما وصلنا بوظبي بالسلامه

ردييت البيت وكالعاده بحشرتيييييه.. سرت حجرت اختيه ووايهت ابويه واختيه الكبيره وسولفت وياهم وخلاف صليييييت وقعدت اطبع ع اللاب اشغال ابويه وخلصتله

وقلت بكتب اليوميه فالمنتدى.. وهذا اللي صااار

ادعووووووولي انه الله ييســـــــــــر امـــــــــــوري

خويت الشوق · 07-10-2008, 12:38 PM

اكتــب يــوميــتي الســاعه 11:18 الظحــى

الأحــداث كااانت امس فلييل

بــعد ما بنــدت اللاب وكتبت شو صار امس.. نزلت تحت لأنــهم يــزقرووني للأكل ..

قبل لا اقــعد ع الصفـــره .. حســيت بضـــيجه بس مــا اعرف من شو .. سكت عن الموضووع وكلت.. أكل وانا اوجه نظراتي للكل.. ما أعــرف .. حســيــت إنــي ضــايعه من بينهم ..

المهم نشـــيت من على الصــفره بكــل هدوء وسرت غسلت ايديني ورديت عندهم .. الموجودين كانوا (الوالد الوالده اختيه الكبيره وخواتي الصغار انثينه)

كــانوا يــسولفوون عن اشياء واايده .. وانا بغيت اغير مودي .. جان اسوولف وياهم .. واتناسى الضيقه اللي يتني

المهم قلت حق الخدامه يبيلي كووب حليب فرش مع خاشوقة عسل.. ولبت طلبــي ..

شــربت الحليــب وانا اسولف شوي واطالع التلفزيون شوي .. ردت الضــيقه مــره ثاانيه .. ما قــدرت ذيــك اللحظه اسوي شي غير اني احط كوب الحليب ع الطاولة وانش واسير حجرتيه ..

ركبت الدري خطوه خطوه .. مع اني يوم اركب الدري اركض .. استغربت من عمري وايد .. دخلت الحجره .. وفتحت الليت وسكرت الباب .. وقعدت ع الشبريه وانا سرحانه .. الين ما قطع حبل افكاري بصوت مسج

جفت الرقم وابتسمت .. يودت الفون ورديت طرشت مسج .. وبعد كم من مسج دقيتلها .. عرفتوها صح؟؟ "هيه نعم ربيعتيه اللي دوم اسولف وياها"

دقيتلها بس ما كان لي خلق ارمس عسب ما تحس انه صوتي فيه شي .. بس اكيد حست وتمت تسألني بس سكت عنها .. وحاولت ابين انه ما فيني شي .. الين ما يت اختي الصغيرونه اللي عمرها 5 سنوات بدفاشه

اتقولي: (وييين الفلم مال kung fu panda)

قلتلها: (ماريد اعطيج هب وقته .. اتجوفيني ارمس فالفون)

تمت اتلعوزني .. وما حسيت بعمري اللا وانا اعطيها كف ع الطاير .. بس ع الخفييف .. ودخل صبوعي في عيونها ..

عورتلي قلبي .. شليتها وحببتها .. قلتلها انا سوري .. ما اقصد .. وطبعا ربيعتيه كانت ع الخط وتضحك ..

المهم .. يت اختيه الثانيه اللي عمرها 8 سنوات بتدش ال 9 وهي بعد الثانيه عصبووبي..

سويتلهم طاف خلاف .. وتميت ارمس ربيعتيه وبندت عنها عسب ترقد .. لانه صدعت من الحشره اللي عندي

جان اجووف الساعه .. جفتها 11:15 فليل .. اقوولكم ما اعرف شو صااار فيني .. سرت ارررركض تحت .. جني خبله ..

نـــــــووور بــدأ .. تميييت اطالع نور مع اختيه الكبيره .. وخلاف يا ريلها من الشارجه

تم يسولف ويانا .. وجي .. وما جفت نووور من حشرته .. بعد ما خللص نوور اتوكلت وسرت الحجره .. وتميت ع الامسن شوي .. الين ما غلبني النوم ..

حطيت اللاب عدالي .. وسكرت الشاشه .. وطرشت مسج حق ربيعتيه .. لاني حسيت اني احتايها..

وخلاف حطيت راسي ع المخده امنع دموعي انها تنزل .. ونزلت دمعه حرقتني وحرقت قلبي ... ومسحتها سيده .. وغمضت عيوني بقوه عسب ما انزل اللي بعدها ..

الين ما رقدت ..

اااه نشيت الصبح بضيييجه .. حلمت حلم خايس .. بس ما خليت هالشي يأثر فيني .. اتغسلت وصليت .. وقعدت احاوط فالبيت .. وقلت بكتب شو صار فيني

.........................

خويت الشوق · 07-11-2008, 02:40 PM

الــســـاعــه 1:18 الظهر

الأحداااث .. امس الساعه 6 المغـــرب

سكــرت DVD-player .. وانا اتمدت بكسلل .. وقلت في خاطري (ااه واخيرا خلص الفلم .. بس اكيييد في جزء ثاني لانه مستحيل اتخلص القصه هني) ..

نشيت من الشبريه وطلعت برع الحجره .. جفت اختيه الكبير قاعده ومسطله .. تميت اغلس عليها وهي مالها خاطر .. (شكلها ناشه من الرقاد) .. سكت عنها .. وحطيت راسي ع ورا ... وغمضت عيوني.. جان اسمع صوت نعااال ..

فتحت عيوني واجوف ع يميني منو اللي ياي .. جفت الشغاله يايبه نسكافيه حق اختيه وريلها .. جان اقولها (سويلي انا بعد) ..

انفج باب الحجره الثانيه .. واجوف ريل اختيه ظاهر منها .. ولابس وكاشخ وكل شي .. وبتسم ع الاخير ... وقال يلا ما بتنشوون؟!!!

قلــتلــه: (اوووه نسيت موضوعك .. يلا الحين انا بنش وبتلبس) .. جفت اختيه وقلتلها (يلا نشي اخااف نتأخر ع الفلم) .. هزت راسها بمعنى (انزين)

اتلبست وشربت النسكافيه .. وظهرت برع الحجره .. واجوف خواتي الصغار واختيه جاهزين .. وريل اختيه نازل تحت

المهم ركبنا السيااره .. واتجهنا صووب المرينا .. وصلنا ونزلنا ..

قلت في خاطري (ووووول ليش جي زحمه ...؟؟؟) عقب قلته (اووه تعالو نسيت انه اليوم يوم الخميس)

سرنا صوب السينما .. وحجزنا حق خواتي الغار وحق الشغاله فلم مال الاطفال .. ونحنا حجزنا فلم ثاني

المهم .. اختيه بغت تروح الحمااام .. وطبعا خاويتها بسبت انها حامل في شهرها الاخير..

المهم .. ظهرت اختيه من الحمااام ..
قالتلي: (تليفوني طااح ورا وما قدرت اييبه)

فتحت عيوني وقلت: (شووووو؟؟! .. وكيف طااح) وجان ادخل الحماام وياها وما اجوف غير الكفر طايح بعيد .. والفون ما ادري وييين ..

المشكله انه في كبت صغير ع الايداار .. ويوم تفتحونه يطل للمجااري .. ومال الماااي وبيباات وتيووبات وحااله يعني الفون عليه العووض

المهم

قالت: (شو نسوي الحين؟؟)

قلتلها: (ويييت) .. وسرت عن العامله اللي تنظف الحماام .. وقلتلها السالفه ..

قالتلي: (اوكي مام .. just wait a sec)

قلتلها: (اوكي)

المهم .. سااار اونها بتييب الكفر .. وماشاءالله عليها .. هي بروحها اقصر عنااا .. وما قدرت اتيبه .. وخلااف سكرت الحمام ووقفت عند البااب الخارجي .. وما خلت حد يدخل لانه يابت رياال .. والريااال اقصر عنها ههههههههه .. وما قدر اييبه

دخل ريل اختيه الحماام .. وقدر اييب الكفر .. بس وين الفوون؟؟ ما ندري .. حاولنا وحاولنا .. بس ماشي فايده ..

والفلم بعد شوووي بيبداا .. قال ريل اختيه: (خلااااص خله يوولي)

اختيه قالت: (كيف يوولي وانا ابا ارقاام الناس .. انا بربي بعد كم من يوم ولازم اطرشلهم مسجات وهب مسيفه ولا رقم عندي)

وحاول ريل اختيه بس ما قدر .. وقالت اختيه (خلااص هب لازم)

وانسدت نفسهم عن كل شي .. بس انا غييرت الموود وتمييت اسوولف ويااهم الين ما دخلنا السينما

وطبعا الفللللللللم رهيييييييييييييييييييييييييييييييييب .. بس اللي خرب عليه انه حد اتصل فيني من رقم غريب .. وطلعت بنت تتفلسف عليه وما ادري شو .. وما رديت عليها من بعدها وتمت تحشرني

الين ما عرفت انها وحده تقرب حق ربيعتيه ..

رديييينا البيييييييت والموود توووب .. كلنا وسولفنا وبدا نووور وجفنااه .. بعدين حسيت انه فيني رقااد ..

حطيييت رااسي ورقدددددددددددددددددددت ع الاخيييييير

الصبح .. فتحت عيوني ع صوت المسج .. احاول اقرا .. جان اطالع مسج يوم اليمعه .. ابتسمت .. مع انه كانت فيني ضيقه بسبت الاحلام اللي كل يوم والثاني احلمها .. استغفرت ربي وحطيت راسي وبندت عيوني ..

جان يوصلني مسج ثاني .. نشيت .. واجوف مسج من ربيعتيه اتصبح عليه .. رديت عليها وخلاف دقيلتها وسولفت وياها شوي ..

الين ما نشيت وصحصحت وصليييييت .. واحاااول انسى الحلم الغبي ..

نزلت تحت اجوف منو موجود .. الكل كان قاعد يسولف .. سلمت عليهم وشاركتهم بالسوالف شوي .. وخلاف رديت الحجره ..

فتحت اللاب .. وسيده دخلت الم الامارات .. صوب اليوميات .. عسب احط شو استوالي

وهـــذا كل اللي صـــار

خويت الشوق · 07-12-2008, 08:10 PM

غيـــرت نــكي باااركوووولي ..

يمــــكن هــالنـــك يــكون احـــسن .. عســب ما أكـــون شــريــه ..

اليوووم؟؟ اااااه شو سوييت اليووم .. واايد شياااء .. اشيااء غبيــيه ..

اخــتيه ردت من الــسفر .. اممممم بتقولون منو هاي .. ما قــلتلكم عنها .. هاااي اختيه اللي اكبر عني متخرجه .. بس هب معرسه ..

سايره امريكا مــع طالبات الجامعـه .. هي تشــتغل فالجـامعه .. TA.. يعني مساعد اكاديمي ..
وماشي قعدنا وياها ..

بــخبــركم بــعدييين شو صــار الحين انا بزي

بس اباكم اتباركولي ع اسمي اليديييد .. حلوو صح ؟؟؟ خخخخ

خويت الشوق · 07-13-2008, 01:54 AM

الـــيوووم .. وشو هو اليـــوم بالنســبى لــي

قد ما أقــدر أحـــاول اخفــي كــل اللــي في خاطري .. بــس عشان انسـى هــمي .. حاولت وحاولت..

الموووووووهييييييييييم ماعلييييييينا .. ما نبى نكد ..

(الاحدااث الساعه 10:30 الصبح)

نشــيت ع صــوت المــسج .. وكــالعاده ربيعتيه مطــرشه مســج اتصــبح علــيه .. دقيــتلها بدون ما حتى اقــرى المســج وعيووني محووله ..

انا: الووو
ربيعتيه: هلا والله ..
انا: اهليين ..
ربيعتيه: شو راقده
انا: همممم
ربيعتيه: عيل ليش داقه يابوج؟
انا: اوووفف كيفي .. (كان مودي للظراابه والمناقر هههه والمغاايض شوي)

المهم غايضتها ولعوزتها ولعوزتني .. فجأه حسيت بألمم فضيييع في قلبي .. سكت عن الموضوع .. وطبعا سولفنا عن وايد اشياء وبعد ساعه وشوي تقريبا .. بندت عنهااا

نشيت وانا بعدني ما تغسلت حتى .. نشيت وانا متعااايزه انش .. ابا ارقد بعد .. سرت اتغسلت وسيده سرت خذت دواي بدون سابق انذار .. وشعريه كششششششه .. وويههي جنه حد عاطني مليوون الف طراق ..

طلعت من حجرة الواالد .. ولا اجوف اختيييه اللي اكبر عني جدام ويههي ... وراده من السفر

وانا جي

لاااا يااااااربي .. شو هالحااااله .. اختيه يايه من السفر واسلم عليهااااا وانا بهالحاااله؟؟؟

اختيه: اعوذ بالله من الشيطان الرجيم .. لا اله الا الله .. (اتهز راسها) .. انتي ما بتتغيرين (وسلمت عليه)

انا (والابتسامه شاقه الحلج..ومن هناك احج راسي اوني مستحيه): يابووج شو اسووي ليش جيي انتي؟؟ .. تطلعين في اوقات جدا حرجه ؟؟ .. وبعدين شحالج وشو اخباارج وشو امريكا وشو البنات وشو الدكااتره وشو الجو ..

اختيه: اعصابج .. اول شي سيري مشطي كشتج وخلاف رمسي

انا: اووو السمووحه .. الحين بسير ( وعلى طوول رحت الحجره .. زين ما طحت ع ويههيي .. وانا امشط كشتيه ومستانسه ع اختيه.. رديتلها)

اختيه: هي جي زين .. هااا سمعنا اخبااار يديييده

انا: قلتلها ها شو اخبااره بعد؟

اختيه: قالولي بتنتقلين من الجامعه

انا: هييه يابوج احسن شو نبابها جامعة الامارات .. الشارجه اهون واحسن

اختيه: نصيحتي تمي فالجامعه ولا تسمعين كلام حد .. حرام بتضيعين عليج سنه كامله

انا (بدون اي اهتماااام): طاااف طاااف ..

المهم بعدين سارت اختيه رقدت .. وانا تميت احااوط فالمنتدى ماعندي شي اسويه .. وخلااف سرت الحمااام اتسبحت .. وطللللعت فررررررررررررررش .. وع الساعه 3 وشوي

اتغدييينا كلنااا ونشت اختيه من الرقااد ... وطبعا انا مع حشرتيه فالبيت الكل متلعوز ..

الــــــــــساعه 4 ونـــــــــــص

سرنا فووق فالصاله .. الكل كان قاعد .. وطبعا انا قعدت عدال الاغرااض .. طبعا تعرفون يوم الواحد ايي من السفر لازم اييب هدايا وهالخرابيط .. وطبعا انا اتريا هديتيه ..
كنت اجووف الاغرااض .. بتمعن ... (ملقووفه صح) .. ههه شو اسوي
المهم .. سمعت امايه تزقرني

امايه: "اسمي" .. تعالي بعطيج شي .. عطيه حق البشاكيير

انا: امااايه دخييلج .. عطي اختيه الصغيره انا مافيني

امايه: انزيين ..

رجعت اجووف الاغرااض .. وانا سرحانه .. ما اعرف في شو .. قطع حبل افكااري .. بوووسه من اخر العنقوود ع راسي ..

جفتها وابتسمتلها

انا: ها حبيبي شو تبين؟؟

اخر العنقود: ماشي بس ابا احبج

انا: دخيييييلج ارحميني .. (شليتها وتميت ابوسها الين ما لاعت جبدها مني)

خلااف خذت اغرااضي وحبيت راس اختيه الكبيره
انا: مشكووره ما تقصرين ..
اختيه: العفووو

سرت الحجره واحس بصداع ما ادري من شو .. حدرت المنتدى وسولفت فيه .. الين ما حسيت اني لازم انش واقعد مع اهليه ..

الســـاعه 10

نزلت تحت .. جفت الكل متيمع اللا اختي راعية امريكا .. حلوه هاي راعية امريكا .. المهم .. تعشيت برووحي لانه الكل متعشي .. وكنت اكل من الخااطر .. ما ادري ليش حسيت بيووع فضييع

كلت وكلت وكلت .. الين ما خلصت صحنييييي

خلااف يا نــور وجفــته ..

واخــر شــي يــوم خلــص .. ابتسمت حق اختيه المعرسه وقلتلها

انا: ما بسااامح مهندوه الدب .. يوم انه جي يسوي في نور

اختيه الكبيره: صدق ماعندج سالفه .. نشي نشي عني خليني اسير فوق وارقد

انا: انزين يا مداام ..

سرت فووق وسسسسسسيييييييده يييت ع اللاب .. وقلت بكتب يوميييتيييه ..

وهـــذا اللي صـــار

هييه صح قبل لا انســى ..

مشــكوريييييييين للـــي عبــرني وقــيم يوميــتيه

خويت الشوق · 07-13-2008, 03:29 PM

اكتب اليومية الساعه 1:45 الظهر

الاحداث الساعه 2 فلييل

كنت متلحفه ومبنده الليتاات .. ووحده من ربيعاتي ع الخط .. اقولها ابا ارقد وهي هب طايعه اتخليني ارقد ..

انا: يابوووج ابا اررقد
ربيعتيه: مابا كيفي
انا: ياربي منج
ربيعتيه: هههه

سولفنا في اشياء واايد .. وجفأه .. (دشششش)... حد فتج الباب بدفاشه

نشيت مفزوعه .. وخليت الفون بعيد عني .. وما اقدر اطالع شي .. فتحت امايه الليت وتناهي ..

انا: شو فيج شو صاير؟؟ (وقلبي يدق بقوه)
امايه: اختج دقها الطلق شكلها بتربي ..

ماعرف شو ياني هاللحظه .. نشيت وانا مثل الخبله .. ما اعرف اسوي شو ولا شو .. (اووه تعااالو .. نسيت ربيعتيه ع الخط) ..

انا: اقولج برمسج بعدين
ربيعتيه: اوكي ماعليه

بندت عنها بدوون ما حتى اقولها فداعت الله .. سرررت سيده عند اختيه اجوف كيف صحتها .. كانت تعبانه من الخااطر ...

اختيه: يبيلي عباتيه وشيلتيه .. ما ارووم اتحرك
انا: ان شاءالله .. (وسويت كل اللي تباه)

لبست عباتيه وشيلتيه .. وحدرت حجرة امايه

انا: امايه انا بسير وياكم
امايه: انزين انزين .. سيري شغليلي السياره
انا: انزين اوكييه

نزلت بسرعه ع الدري .. ادور المفتااح مثل الخبله .. ظهرت برررع وفتحت السيااره .. ورديت البيت مره ثانيه عسب اساعدهم يشلون الاغراض

امايه: سيري عاوني اختج الين ما تنزل الدري
انا: ان شاءالله

سرت فوق مره ثانيه يودت اختي من ايدها ونزلتها وياي

اختيه: اووه نسيــ،،،ــيت بــ،،ــاقطة المـــ،،ـستشفى .. سيري يــ،،ــبيــ،،ــها
انا: اوكييي بس اول بوديج السياره وخلاف برد فوق

وبالفعل وصلتها للسياره ورديت اركض ايبلها البطاقه ..

اتوجهنا لبيت خالوتي .. وخذناها من بيتهم .. واتوكلنا للمستشفى

فالمــســـتشفــــــــى

دخلنا الطوارئ .. وشو كان زحمه .. حطيت ايدي ع راسي (ماشاءالله كل هاييلا الحرييم حوامل؟؟.. ماشاءالله ربي يسهل عليهن)

يلست وانا متوتره .. وخلاف زقرت النيرس اختيه .. وتمت تفحصها وراحت بعدين عند الدكتوره وسارت سوت تخطييط قلب للجنييين

كنت قاعده برع وادعي انه ربي يسهل عليها .. ظهرت امايه من حجرة الدكتوره

انا: ها امايه بشري
امايه واتطالعني بضييق: اذا ما وقف النزيف .. بيسوولها عملية
انا ومبطله عيوني ع الاخير: عملييييية شووووووو؟؟
امايه: ما ادريبهن .. هااي الدكتوره ما تعرف شي ..
انا: لا اله الا الله ..

وبعد نص ساعه طلعوا اختيه من غرفة الدكتوره.. شلوها مع شبريتها.. وودووها غرفة الولاده

حجررررة الولاااده

النيرس ماسكه اختي من ايدها اتعاونها انها تعدل عمرها

النيرس:can you wait outside please excuse me
انا: اوكيييك

اتريييت برررع وانا ما اتحمملل اجووف الم اختيه يزيييد .. تميت اقرا وادعي .. الين ما ظهرت النيرس ..

حدرت داااخل .. واجوف اختيه شو حالها .. وخذت القران .. وطلعت من الحجره وتميت فالممر

قريت القران بخشووع .. نزلت دمعة من عيوني .. والثانيه والثالثه والرابعه ..

طلعت امايه من الحجره ..
امايه: تعالي دخلي داخل .. هني بيطلعونج ..
انا: انزين

دخلت دااخل وتميت اقرا عليهااا .. وطلقها مره يزيييد ومره يخف .. ولا تنسون انه بجر

صدق الله العظيييم

سكرت القران .. وبست راسها ..

اختيه: بزوووع
انا وقفت نفس البلمه ..
اختيه: بزووووووووووع
امايه: شو ؟؟ ..
ونشت امايه اتييب شي عسب اتزوع فيه

فجأه بدون سابق انذااار .. رفعت راااسهاا اختيه .. وزااعت عليه لانه انا اللي جدامها

انصدممممممت

.. وقفت مكاني .. اول مره حد يزوع عليه .. ما عرفت شو اسوووي

امايه: ههههه .. سيري غسلي عباتج ..
انا(اطالع امايه هب مستوعبه): هاا؟. انزين اوكي

رحت نظفت عباااتي .. وابتسمت من الخااطر وانا اجوف اختيه تبتسم واتقولي سوري .. بست راسها قلتلها ماله داعي هذا كله ..

زقرنا النيرس عسب اتغيير اللحاف لأختيه واتنظف الخيااس ..

يت النيرس المناوبه عنها .. واتجوف كل شي .. انا ظهرت برع وحطيت راسي ع الطاوله .. وغمضت عيوووني ..

سمعت صوت نعال.. شليت راسي من ع الطواله وفتحت عيوني

وحده من النيرسات: you have to wait outside dear..
انا وفي خاطري مالي خلقج اووف: okik but am waiting for my father
النيرس: okay wait outside please
انا ياهي بلشه: I’ll talk to my mum then I’ll go
النيرس: okay

راحت عني .. جان اسمع صوتهااااااا من بعيد

النيرس: hello,, yes,, please can you come and take these people that are waiting in this hall,, yaah,, yaah,, thank you

انا انقهررررررت .. شليت عمري وسرت الحجره وانا مطنقره واقول حق امايه السالفه ...

امايه: خلهم يابوج وتعالي يلسي هني ..

يلست عند امايه .. وانا ادعي لأختيه .. وفجأه دق الباب .. طلعت هاي مالة السكيورتي

السكيورتي: عزيزتي ممكن تطلعي برع .. لانه ممنوع تؤعودي هون
امايه: ان شاءالله بتظهر بس نتريا ابوها يشلها (طااااخ طيييخ طووخ)
السكيورتي: ممنووع مدام
امايه: استغفر الله العظيم.. اتجوفون في حد له خلق يرمس الحين ؟؟؟ خلاص يابوج قلتلج بتظهر مع ابوها
السكيوتري: اوكي ومتى بيي ابوها
انا: اقوولج ادخيلج هب وقته الحين ترمسين .. ما بيتأخر انتي بدال هالرمسه كلها ادعي حق اختيه .. ما اتجوفينها كيف.؟
السكيورتي وهي متلومه شوي: خلاص اوكي (وطلعت)

انا: يا امايه شو ها يعني حتى في بلادنا بيتحكمون فينا هالاجانب
امايه: خلهم يولون ..

تمينا ندعي ندعي .. وكل ما نعدي يخف الطلق ويزيييد .. وعلى هالحاله الين الساعه 8 الصبح

دق البــاب .. دخل ريل اختيه علينا .. وجاف اختيه وباسها ..
ريلها: ربي يقومج بالسلامه غناتي .. قوي قلبج وما بقى شي
اختيه: ان شــ،،ــ،،ـاء الله

دخل ابويه .. وطبعا ممنووع .. وقال كلمتييين (ربي يسهل عليج) وظهر برع

وطلعنا انا وريل اختيه وابويه صوب الباركنات .. عسب ارد البيت واريييح .. لانه شكلها اختيه مطوله

البـــــــــــــــــيـــــت

رديت البيت .. وانا عيوني رايحه فيهن .. ما ادور غير الشبريه .. فصخت عباتي وحطيت راسي ورقدت

تلفوني يرن .. وعشرين الف مسج .. نشيت وحطيت الفون سايلنت ورقدت مره ثانيه ..

دخلت عليه اختيه الصغيره اللي عمرها 8 سنوات ..

اختيه: قومي قووووووومي .. اختنا ربت ويابت بنت
انا فتحت عيوني بصعوبه واحاول استوعب ..
اختيه: نشي نشي ..
انا: شو صاير
اختيه: توها ربت ويااابت بنت
انا ابتسمت من الخاطر وحمدت ربي: الحمدلله يارب الحمدلله
اختيه: عمييي سار عندها (عمي=ريلها)
انا: هييه انزين .. ورديت احط راسي ع المخده .. وخلاف نشيت اصلي صلاة الظهر وركعتين شكر

واتصلت في امايه ما اترد وعلى خالوتي ما ترد .. هب مهم الاهم انها قامت بالسلااامه ويابت بنوووته ..

باركولي استووويت خااااااله

.. الله بيسموني خالوه .. هههه شعووور حلوو صح؟؟؟

يلا ما بطول عليكم .. لازم انش اتلبس وجي .. عسب يمكن اسير المستشفى او يمكن اكمل رقادي ..

أدوات الموضوع
عرض صفحة طباعة الموضوع أرسل هذا الموضوع إلى اصدقائك
طرق العرض	تقييم هذا الموضوع
العرض العادي العرض المتطور العرض الشجري	تقييم هذا الموضوع:

عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف)