أنكتب الجرح في عمري و لكن في أمل ينمحي من حياتي

مرحبا شحالك أن شاء الله بخير و عافية
حبيت أنزل لكم يومياتي عجان يوم أدخل المنتدى أذكر المواقف إلي صارت لي
و الأحداث و ذكريات حلوة ومرة عشتها في حياتي

انكتب الحزن في عمري و لا عرفت كيف أمحيه
حاولت بكل الطرق أزيله لكن ولا فاد شي
تعثرت في طريجي يوم ورى يوم
وطيت كرامتي مرة وندمت على الوطيه
جرحت أحساسي المرهف و المجروح
كتبت أسطري أعبر فيها عن دنيا
ندمت العيشة فيها و الجروح

شرايكم في البداية أن شاء الله حلوه
أن شاء الله تعبر عن العنوان و الأحداث القادمة

راحوا وراحت روحي معاهم
تحرسهم مع كل خطوة يخطونها
تداريهم من كل مصيبة تنتظرهم
تدعيلهم بالرجوع لي بالسلامه
أحبهم من كل قلبي و روحي
أشتاق لهم في كل لحظة وثانية
ربي يرجعهم لي بالسلامة

مرحبا .....
اليوم سافر أبوي و خالي مع أجدودي
للعمرة
تمنيت أروح معاهم
و الله من زمان ما رحت العمرة
في الصيف كنت بروح مع عمي بس الضروف ما سمحت
و المرة هذي بعد ما سمحت
لأني ثنويه عامة ولازم أشد حيلي
بنفجر
كله نبي نسبة عالية نبي نسبة عالية
و أنا مسكينه يا ذاكرين لكم ربي
إلى بس إن شاء الله إن شاء الله

نسيت أقول لأبوي يدعي لي و البقية بعد
لي و لرعي و للكل بالطبع
بالتوفيق

مع السلامة
أشوفكم في الجريب العاجل إن شاء الله

مرحبا
عساكم بخير إن شاء الله
اليوم قعدت الصبح متنرفزة
إزعاج الصراحة أخواني و خواتي و خالتي معاهم
داخلين طالعين في الغرفة
خاطري أضربهم أبي أنام
ما كافي أنهم قاعدين يدخلون ويطلعون في الغرفة
و بعد يزاعجون
ياربي
بس شو نسوي اللهم صبرك يا روح
و باجر علي أمتحان تاريخ شفوي
و دين تسميع آيه
و عربي تحظير
خخخخخخخخخ
في الأيام إلي طافت ما مسكت اكتاب
ما كان خاطري أدرس و الله مليت
بس شو أسوي آخر سنه نشد حيلنا

اليوم ياني خبر روعة
خالتي إلي في جلبا ربت ويابت لنا بنوته صغيرة
و الله خاطري أشوفها
ياربي عسل الصغار صراحة
و بنتها الصغيرة تقول لأمها أمي يالله يبي النونوه أبي أشوفها
أنا أبي أروح أشوفها بس محد بيوديني
أمي قالت بنروح الأسبوع الياي
لأنه مدرسة
أف من المدرسة
حلو اليوم تاريخ 4/4/2009
حلو التاريخ

مرحبا اليوم قاعده أشوف الإيملي ووصلتني هذي الرسالة
وحبيت من إلي يشوف يومياتي يطلع عليها مثل ما أنا شفتها
لأنها هزة الضمير بداخلي مع أني ما اسمع أغاني أو أشوفهم
بس أحب أنكم تشاركوني فيه
وهذا مضمون الرسالة :

مرحبا من زمن وانا أدور أبيات هذي القصيدة
و اليوم الحمد لله حصلتها
أحبها وايد و في النيكنيم مالي بعد حاطتنها بس البيت الأول منها
و الحمد لله حصلتها وحبيت أحطها في دفتر يومياتي عجان تشاركوني بكلماتها وأحاسيسها
و هذي هي القصيده :

بسم الله الرحمن الرحيم
في هذا اليوم إلي هو تاريخ 11-4-2009 يوم السبت كان يوم إمتحان السيبا رياضيات
كنت رايحة مع ربعي للإمتحان في التقنية في راك
فكنت ماخذه معاي مبايلي عجان إذا أمي و لا حد سأل علي
كنتا قاعدين في الباص نسولف و لا ندري بالدنيا
وصلنا لتقنية بوقت متأخر بشويه
يقولون لنا يالله أركظوا عجان ما يفوتكم الامتحان
فنحن مساكين نركض لين ما وصلنا
بس المصيبة أنه بنتين بس لحقن وأمتحنن و نحن خلونا للفترة الثانية الساعة 12:30
مساكين نحن تامين على أعصابنا نتريا ونتريا
ربيعتي في الصف أمها أتصلت لها وقالت لها خبر
فقعدت تصيح و ربيعتنا إلي معاها قاعدة بس تهديها
و نحن نسأل شو بلاها قالت لنا تخبي الخبر بأنه تصيح عجان البطاقة
بس طلع ما هذا الشيء إلي تصيح منه شي ثاني يخص ربيعتنا الثانية
و أنا أمي اتصلت لي الساعة تسع ونص و سألتني إذا حد حذالي أو لا قلت لها هيه قالت لي روحي بعيد عنهم
رحت و قالت لي ربيعتج الفلانية موجوده قلت لها هيه بس بعيد عني بوايد في إخر غرفة الأنتضار
قالت خلاص ولا أقول لج بعدين بقول لج
فأنا مسكينه أب أعرف و محد يبي يقول لي
تريت لين الساعة 12:00
رحنا نمتحن
وبعد ما خلصت من الأمتحان بربع ساعة تقريبا طلعت
رحت للإستراحة وقعدت مع ربعي نراجع الأمتحان و نعرف شو السالفة
فتحت موبايلي لأني كنت غالقتنه وشفت كم أتصال من أمي و خالتي
أتصلت لأمي طمنتها وبعدين سكرت عنها
أتصلت لخالتي و سولفت معاها شويه وبعدين سالتني عن نفس البنت
قالت لي حد البنت الفلانية حذالج قلت لها لا بعدها ماخلصت امتحان
قلت لها صبري أنتوا شو بلاكم اليوم كله تسالوني عن هذي البنت أنا قلبي يعورني شو السالفة
قالت لي أوعديني بأنج ما تخبرين حد ولا تخبرين البنت
قلت لها وعد بس قولي شو السالفة
قالت لي : أبوها توفا
فديتها والله قعد أقول لخالتي كيف حرام و هسي البارحة رايحة له في المستشفى قالت اليوم توفى
قلت لها والله حرام
تعرفوا شو كانت تقول البينت لنا في الباص
أنا بقول لأمي أني ما أروح المدرسة باجر
كأنها كانت حاسة
قعد أقول لخالتي حرام والله حرام
كنت شويه وبصيح
قعدت تقول لي خالتي لا تقولين لها أوكي أنتي وعدتيني
قلت لها خلاص ما بقول و امري لله
بس هي يمكن تقدر تشوفه انا قلت لها
قالت لا ما تقدر لأنهم دفنوه
و الله حرام
قعدت بس خاطري أتنفس أحس بكتمة
طلعت برع مع ربيعتي إلي كانت تصيح الصبح
وقت لها عرفت فقالت أنا عجان جيه كنت أصيح
فقلت لها ليش ما خبرتيني
فقالت لي أمي قالت لي لا تخبري حد
و بعد شويه يوم رجعنا نحن أنا وربيعتي داخل شفنا بأنه كل البنات عرفن
و حلفناهم بانه ما يخبرونها
فقالن اوكي
فما خبرناها
حتى يوم وصلت لنا قالت بنات انا قلبي يعورني
فقلنا لها يمكن من الأمتحان
قالت يمكن لانه هي قبل الأمتحان ما يعورها قلبها بس يوم تخلص منه
فقعدنا نقول لها غلقي المبايل بس عجان محد يخبرها
فقالت ما أعرف حد يغلقه لي
فغلقناه لها
و قعدنا بس نبين لها بأنا ما نعرف السالفة
ويوم وصلنا بيتهم كانت موجوده سيارات وايده جدام بيتهم
خوفتني يوم شهقت وقالت :ألحين هذي السياير كلهم جدام بيتنا
و انا بس أطلع شو ردة فعلها
قالت بنت منا هيه
قالت أنا أبي أعرف شو السالفة : قلنا لها يوم بتنزلي بتعرفي
نزلت مسكينهة وهي ما تعرف عن شي
و انا إيدي على قلبي أخاف يستوي شي
ونزلن معاها بنتين عجان يخبرنها
وأنا روحت اليت وخيفانه شو بتكون ردة فعلها
و يوم عرفت حسيت أنه رام أنا كتمنا عنها
قعدت تقول للبنات كنت بشوفه إذا خبرتوني
و البارحة رحت أعزيها فالحمد لله كانت أحسن من إلي قبله
و قعدنا نخبرها عن إلي أستوى في الصف و نواسيها أنا وبنت من صفي وبنت من العلمي و بنت من ثاني ثنوي أدبي
قعدنا بس نسولف معاها وبعدين روحت وهي باجر بتي لأنه عندنا أمتحان سيبا تجريبي E
فديتها والله
الله يغمد روح أمواتنا الجنة و يبعدهم من النار
و هذي السالفة
بس أنا نقصت منها بعض الأشياء الخاصة

السلام عليكم
مرحبا السموحة على التأخير بس حبيت أرد على المعلقين أول بعدين برد أقول شو أستوى معاي من اول شي

( مبروك إن شاء الله تتربى في عز أبوها .. ويش جلبا؟ منطقة؟ " فاطمة الصغيرة" )
الله يبارك فيج الغالية
الله يسلمج جلبا هي أسمها كلباء بس أنا أسميها جلبا
و هي منطقة تابعة للشارقة في دولة الأمارات
و إذا تبين تعرفي عنها شي فتحي قوقل و بتشوفين عنها
لا تحرميني من تواجدج


(وااااااي هالفيديو بصراحة تقشعر له الأبدان على قولتهم .. يا رب نسألك حسن الخاتمة .. متابعة لج "زحمة جروح")
صدقج الغالية أنا بعد ما شفته حسيت و الله شي لازم الكل يعرفة
و هو أنه الأغاني والأناشيد حرام
لا تحرميني من تواجدج


(يلله مقطعُ جدً مؤثـر .. شكراً لكِ يارقيقة .. ضَيءْ)
أكيد يقطع بالقلب و العفو الغالية
لا تحرميني من تواجدج


مشكورين إلي علقو على موضوعي الصراحة ما أعرف شو أقول
بس أحب أقول شكرا

بسم الله الرحم الرحيم
بااااااااااااااااركولي
خلصت خلصت من المدرسة
و من المذاكرة والدروس
والكتب و الواجبات و الشنطة
و من الإزعاج و الحشرة و الدرجات
يااااااااااااااااااي كشخة
الحمد لله خلصت وخلصت من كل شي و من سوالف المدرسة
بس و الله حلوه سوالف المدرسة و المعلمات
حرام اليوم ودعت معلمة العربي عاشقة الضاد
أحب هذي المعلة بشكل جنوني
روعة حصتها و شرحها وضحكتها و كل شي فيها
حتى سوالفها حلوه
و دعت طاولتي و الصف و الطابور و المديرة و الوكيلة و الملعمات
و المقصف و كل شي في المدرسة
بس شو نسوي هذي سنة الحياة