|
|
|
|
|
|
||
| إعلانات منتديات ألم الإمارات |
|
|
|||||||
| أرشيف المقهى أرشيف المقهى مجلس غير مخصص للمشاركات للإطلاع فقط . |
| كلمات البحث |
| ايام من حياتي |
|
|
LinkBack | أدوات الموضوع |
التقييم: 
|
طرق العرض |
|
#1
06-16-2010, 03:40 AM
|
|||
|
|||
أيام من حياتي
ها قد أتيت بيومياتي إليكم...
وكعادتي مع ألم الإمارات الذي يمثل أحلى بدايات لي... فقد شهد من قبل مولد أول كتاباتي إليكم...أقصد نشرها... واليوم يشهد أول مرة أكتب فيها يوميات....خالص لم أستسغ من قبل أن أكتب يوميات أو مذكرات.... ربما لأنني لا أجيدها، وربما لأنني لم أجد لها فائدة من قبل، وربما لأنني ظننت أنه من الغباء أن أخرج مشاعري على ورقة معرضة لأن يقرأها أي شخص يتجرأ ويقتحم خصوصيتي. ورغم ذلك، ها أنذا أحضر بمحض إرادتي إليكم، وأضع بين أيديكم، أيام من حياتي... لن أتطرق فيها إلى حياتي كاملة، وإنما إلى بعض اللحظات التي مررت بها ولا أنساها، ولا أخجل من قولها لحظات حلوة...ولحظات مرة لحظات ايجابية...ولحظات سلبية ربما كان الغرض منها أن أخرج بعضاً مما يعتمل في صدري ويكاد أن يخنقني وربما كان الغرض أن أكشف وجهاً آخر لرباب... لكن الأكييييييد إني مش حاقول غير اللي أنا عاوزة أقوله...  أتمنى ألا أزعجكم بأيامي رباب
|
|
06-16-2010, 03:45 AM
|
#2 | ||||
|
16/6
اليوم الأول 16/6
اخترت اليوم ليكون بداية يومياتي معكم....مثلما كان بدايتي. قلت من قبل إنني أردت أن يولد كل عمل من أعمالي بين يديكم في يوم يهمني تاريخه، واليوم أهم تاريخ بالنسبة لي... فاليوم مولدي. وبعيداً عما قد يتبادر إلى الأذهان من أن أتحدث عن أي مما قد يخالف قوانين المنتدى، فأنا هنا لأتحدث عن عام مضى من حياتي بحلوه ومره، بخيره وشره، بايجابياته وسلبياته، اليوم أبدأ عاماً جديداً يقربني من الموت...هكذا يقول البعض. ولكني أبدأ عاماً جديداً أدعو الله فيه أن أكون إليه أقرب وعلى طاعته أدوم. أما الموت فلا يؤرقني، لأنه سيقربني من أحبائي.(جرى إيه يا روبي حتبدأيها غم من أولها...وحدي الله كدا واتعدلي). لا إله إلا الله محمد رسول الله وقفنا فين؟؟؟ أه عام جديد ولدت في يوم هو أقرب إلى انتصاف العام...منتصف الشهر السادس من العام الميلادي(أما بالهجري فشهر رجب...حد سألك؟) ربما كان لمولدي في هذا المنتصف علاقة بكوني معتدلة ووسطية في أغلب الأشياء، يعني مليش في التشدد ولا التسيب...وخير الأمور الوسط. لكن في الوقت نفسه، ولدت قرب انتهاء فصل الربيع(قبلها بأربعة أيام بس)...وطبعا فصل الربيع هو أبو التقلبات. فعشان كدا تلاقوني مزاجية، متقلبة، وأوقات كتييييير من الصعب تعرفوا أنا عاوزة إيه....أصلاً أوقات أنا نفسي بابقى مش عارفة أنا عاوزة إيه وبعيداً عن الكلام في الأبراج والكلام الفارغ دا...الشيء المشترك بيني وبين صديقاتي وأفراد أسرتي المولودين في شهر 6 هو تقلب المزاج...من الآخر moody بس مش لدرجة الشيزوفرانيا يعني... وحاجة تانية كمان...كلنا حبوبات...يعني ندخل القلب طوالي بدون استئذان(واخدة في نفسك مقلب جاااااامد) الحاجة الوحيدة اللي مش باشترك فيها مع الجماعة الmoody دول هي الغيرة... أنا واحدة مابتعرفش تغير  بس موضوع الغيرة دا أكيد اكيييييد حيبقى له يوم لوحده إن شاء الله. لنا عودة. رباب
|
||||
|
06-16-2010, 04:07 AM
|
#3 | ||||
|
تابع 16/6
تابع 16/6
المفروض الواحد يراجع كدا عمل إيه في السنة اللي فاتته ويقيم نفسه عشان يشوف الصح من الغلط، وإيه محتاج يتغير وإيه محتاج يتحسن. أنا بأه عملت إيه في السنة دي؟؟؟ صراحة هي كانت سنة باينة من أولها...الحمد لله إنها خلصت. أولاً كنت مكتئبة جداً في بدايتها لإني ودعت العشرينات وحسيت بمعنى إني أكون بنت في الثلاثينات. كل سنة كنت باحتفل مع نفسي بزيادة عمري سنة، لكن في 2009 كنت باتمنى يوم 16/6 ما يجيش... وكأن اكتئابي مش لزيادة عمري بس، كأن قلبي حاسس بالمصايب اللي حتنزل ترف عليه. وكأنه حاسس إني حامر بأصعب موقفين في حياتي في خلال أول شهرين من عامي الجديد ما علينا...الحكاية مش ناقصة غم. كل اللي اقدر أقوله ان النص الأول من عامي الثلاثين، يعني من 16/6/ 2009 كان فترة مش عايزاها ترجع بأي حال من الأحوال... نيجي ل2010، وياااارب تكون أحسن من اللي قبلها  الحمد لله حتى الآن كلها انجازات ومفيش غير إخفاق واحد أو اتنين نشوف الانجازات * في بداية العام اتعرفت على منتدى الم الإمارات عن طريق ابنة شقيقتي طول الصيف الماضي أشوفها واخدة النت من عندي ودافنة نفسها مع اللاب توب بتاعها وقاعدة تقرا في المنتدى أقولها خليكي لما دماغك يلسع من كتر القراية والمنتديات تسويلي طاف وترجع تقرا نسيت أقول إن فيا عيب خطييييير  ...بغض النظر عن إني خالة ديمقراطية مش ديكتاتورية خااااااااالص...العيب هو إني فاااااااااااشلة في حكاية الانطباعات الأولى دي.يعني الشيء اللي أعارضه أو أرفضه في البداية، بمرور الوقت يبقى أحب شيء لقلبي. ودا اللي حصل مع ألم الإمارات لما بدأت أقرا رسمي القصص اللي كانت بتبعتلي روابطها في مكتبة القصص، لأول مرة اتحركت الغيرة جوايا(ودي يمكن أول مرة أغير) وقلت ليه أنا كمان ما انشرش أعمالي في المنتدى، خصوصاً وأنا عارفة إن المنتدى دا بالذات قوانينه صارمة وبتحمي أعمال كتابه ومن هنا اتخذت القرار، واشتركت... *في شهر فبراير اشتركت في منتدى ألم الإمارات بإسمي الحقيقي(أل يعني عشان لو أعمالي اتنشرت بعد كدا<<< بتحلمي يا ماما)...بس أنا مش أخت محمد فؤاد ولا محرم فؤاد ولا نجوى فؤاد... طبعاً تفعيل الاشتراك جه بعد فترة كنت فيها كالقابض على الجمر بس الحمد لله أخيراً قبلوني  * في شهر مارس تجرأت وبدأت نشر قصتي الحقيقة...الحب. وبغض النظر عن يوميات القصة اللي أكيد حاتكلم عنها بعدين، تلقيت أحلى خبر بعدها * الخبر هو تميز قصتي وتثبيتها لمدة أسبوع......واااااااااااااااااو   طبعاً دا في حد ذاته انجاز بالنسبة لي...بس حنتكلم عنه بعدين برضه *في شهر مايو تشجعت ونزلت روايتي الثانية دمعات قلب، واللي بأعيد كتابة أجزاء منها الآن رغم اكتمالها من 2003. * وجاء شهر يونيو...الشهر الذي يقسمني منتصفه مابين عام راحل وآخر قادم. وكأنما أبى عامي الثلاثون أن يرحل دون أن يرسم بسمة على شفتي من خلال منتداي الحبيب. جاء يونيو يحمل في أول أيامه تكريم المنتدى لي ومنحي لقب الكاتب المميز لشهر مايو  ، وياله من تكريم...بجد يومها كنت طايرة من الفرحة ...حسيت أخيراً إن تعبي جه بفايدة...بس برضه مش حاتكلم عن التكريم دلوقتي...أصلاً دا عاوزله يوووووووم لوحدهنيجي للإخفاقات... واحد مانكرش مسؤليتي عنه...وهو إني لحد النهاردة مش قادرة أخلص الماستر، وشكلي حاطلب من الكلية تمديده سنة كمان. الموضوع مش كسل وبس...الموضوع إني مليش نفس افتح كتاب واقعد أقرا وأدور واكتب زي الأول. أما الإخفاق التاني اللي ماليش يد فيه هو الأمومة... إحساس رائع ربنا زرعه في كل أنثى، وربنا ما يحرمنا جميعاً منه، والأهم ما يحرمنا من أزواج صالحين يراعونا وربنا يرزقنا منهم الذرية الصالحة. طبعاً أنا ماليش يد لا في الزواج ولا في الخلفة فادعولي ربنا ييسر لي أموري أنا وبنات المسلمين ويرزقنا جميعاً الأزواج الصالحين اللي نتمناهم تابع 16/6 New Year's Resolutions رغم ان الجملة دي خاصة بأول يوم في السنة الميلادية، ومعناها قرارات العام الجديد، أنا قررت أستخدمها في بداية عام جديد من حياتي... تفتكروا ممكن قراراتي تكون إيه؟؟؟ أبطل السجاير وأكون إنسان جديد؟؟؟؟ لأ طبعاً.... أوعوا تفتكروا إني مدخنة لا سمح الله...أنا لا أطيق السجائر بس أقصد مش حاغني قراراتي الجديدة زي شعبولا ما عمل في أغنيته وقرر يشيل حديد، بس أكيد ححاول أحقق شيء زيادة. يمكن أحن على قصتي قلب أخضر اللي باكتبها بقالي 4 سنين، ولسة ملطوعة عالكمبيوتر في انتظار تعطفي عليها لإتمامها...رغم إني عارفة حاكتب فيها إيه. ويمكن أحن على الماستر اللي بيشتكيني لطوب الأرض كل مافتح فولدر الرسالة وألاقيها زي ما هي(التحديث الأخير 11/1/2010).(لاحظوا برضه إنه كان من قرارات العام الجديد في يناير) لكن الأكيد إني ماقدرش أعمل حاجة في أهم إخفاق بحياتي  ...مفيش غير الدعاء.ولنا عودة مع يوم جديد من أيام حياتي سبحانك اللهم وبحمدك...نشهد ألا إله إلا أنت...نستغفرك ونتوب إليك. رباب أتمنى تكون يومياتي خفيفة، وما يكونش دمي تقيل على قلبكم.
|
||||
|
06-21-2010, 12:30 AM
|
#4 | ||||
|
عدنا
عدنا والعود أحمد
هذه اليومية أهديها إليكم جميعاً إلى كل من شرفني بالزيارة وكل من إهتم بالتعليق على يومياتي صراحة لم أتوقع إن اي حد يعبرني غير ناس معينة إتنين كنت منتظرة يكونوا أول ناس تقيمني وتدخل يومياتي والحمد لله الاتنين ما كسفونيش كانوا فعلاً اول اتنين يقيموني فيه ناس تانية إنتظرتها وما جاتش...بس اديتهم عذر لإني عارفة مشاغل الامتحانات، وعارفة برضه غلاوتي عندهم، فيبقى أكيد هما مش مطنشيني ولا حاجة....وه فديت الواثقين  نيجي للتقييمات اللي اسعدتني وشرفتني صراحة كنت منتظرة صديقاتي هناء الوكيلي أو الشرف المروم يكونوا أول ناس(عشان بس محدش يوقع بيننا أنا كتبتهم بأولوية معرفتي بيهم...بس والله الإتنين غاليين على قلبي زي إخواتي وأكثر وربي أعلم) المهم شروفتي الحلوة كانت اول واحدة تقيمني لإنها كانت موجودة أصلاً عالمنتدى وقتها ودا كان تقييمها يسعد قلبك يا عسل /و احلى يوميات / مبروك / اعتبريني من متابعينك/ شرف الله يبارك في عمرك يا شروفتي ويسعد قلبك وأيامك زي ما أسعدتيني بزيارتك وحديثك الممتع. ربنا ما يحرمنيش منك  تقريباً من كتر الضغط على المنتدى عشان الناس تقرا يومياتي(يا دي الثقة اللي حتودينا في داهية) الموقع توقف عن العمل من صباح 16/6 لحااااااااااد العصر...فطبعاً هنوش اتأخرت في التقييم...دي حتى بعتته من مكتبها قبل ما ترجع البيت(نونو حبيبة قلبي) ودا كان تقييمها سلام الله عليك يا أحلى روبي، يوميتك رائعة جدا راقتني وبالتأكيد ستجدينني فيها دائما أسعد الله أيام حياتك وحقق لك مبتغاك وحصولك على لقب الكاتب المميز وكذا تثبيت قصتك جاء لانك فعلا تستحقينه وبجدارة وإن شاء الله دايما فألف مليون مبروك افتتاح اليومية/هنو وعليك السلام يا قلب روبي، وربنا يسعد أيامك انت كمان ويباركلي فيك وفي صداقتنا...صراحة انتي أكتر واحدة كانت بتشجعني في البداية، ولا زلت من مشجعيني الاوفياء  الله لا يحرمني منكالتقييم دا واللي بعده بجد فاجئوني وأسعدوني الاول من العزيزة إثمد فرح يوميات أجمل من كاتبة أجمل نترقبُ المزيد من فيضكِ .. إثمدُ فرَح .. : ) شرفتيني بالحضور يا إثمد وأسعدتني بكلماتك الرقيقة والمفاجئة الارق والأجمل..دمتي لي  والتقييم المفاجئ الثاني كان من دكتورة جروحة المملوحة مَرْحَبَاْ فِيْج بَيْنَاْ .. الله يَوَفْقِج و يَرْزِقِجْ كِلْ خَيْر وَ يِيَسِرْ أُمُوْرِجْ وَيُنَوِرْ دُرُوْبِجْ .. دِ.جَرُوْحَهْـ اَلْمَمْلُوْحَهْـ .. ألف شكر يا عزيزتي...شرفتيني بالزيارة وأسعدتيني بكلماتك الطيبة وربنا يستجيب دعائك لي ولبنات المسلمين التقييم دا بأه كان من التقييمات اللي انتظرتها، واللي اسعدني مجرد النظر الى اسم صاحبتها هلا هلا تو منا نور المجلس وهـ فديت المنورين - - > مادري قيمتج ع اليوميه قبل اولا ؟العقل ضارب وانااختج >.< ههههه ضحكتني سالفة التواريخ تدرين فيني حساسيه منها ماحبها كله من الاجتماعياااات ...من اشوفها اشوفه هئ - - > حاله مستعصيه هع ..متابعه لج/خواطر والله انتي كمان نورتيني وأنا أختج ههههههه بس زعلتيني إنك مش بتحبي الدراسات الإجتماعية  ...صراحة أنا مكنتش احب الجغرافيا قوي، بس التاريخ عشقي...ومسيري حاعالج حالتك المستعصية هههههههنورتيني يا أحلى خوخة في المنتدى (على فكرة أنا بحب الخوخ مووووووت)طبعاً الملاحظ إن كل التقييمات حريمي...فديت الحريم السنعات  بس الرسالة دي كانت من أحد الأخوة الأعزاء، وأوائل الناس اللي شجعتني على الإستمرار..أخي كينج مون تحية الى الاخت رباب فؤاد قرأت يومياتك وكانت من الجمال والسلاسة بحيث أخذتني معها حتى أخر جزء فيها.. انا بأنتظار تكملت باقي أيامك لكونها من أجمل اليوميات تحياتي لك أخوك ^ ^ ^ كنج مون .......................وداعاً شرفتني أخي بالزيارة والتعليق...عارفة إن التقييم ساعات بيعاكس فالواحد يضطر إنه يرسل تعليقه في رسالة... وعلى أي حال يشرفني وجودك مرة ثانية أشكر كل من زاروني وقيموني وإهتموا بيومياتي إنتظروني قريباً في يومية جديدة رباب
التعديل الأخير كان بواسطة : رباب فؤاد بتاريخ 06-21-2010 الساعة 12:53 AM |
||||
|
06-22-2010, 03:21 AM
|
#5 | ||||
|
اليوم المنتظر
لو سألت أي بنت إيه اليوم اللي بتحلمي بيه أكيد حتقول يوم الزفاف طب لو سألت أي بنت بتعمل ريجيم إيه اليوم اللي بتحلمي بيه...تتوقعوا الإجابة إيه؟  طبعاً يوم الفري اليوم اللي كلنا بنبدأ ريجيم وإحنا منتظرينه اليوم الوحيد اللي بنقعد 24 ساعة فيه ناكل كأننا في آخر زادنا(يعني كأننا مش حنشوف أكل بعد كدا) مهو صحيح مش حنشوف أكل بعد كدا طول الأسبوع بس يعني هو إحنا لسه ما شبعناش جالاكسي ومارس وشيبسي مكرونة بالبشاميل ومحشي وكبسة طول السنة؟ ليه ما بنحسش إن الحاجات دي واحشانا غير أيام الريجيم؟ ليه بنبدأ الريجيم دايماً بيوم الفري وكأننا بنودع الأكل؟ عن نفسي...أبدأ الرجيم بشاي رويال...الله يخليهولي هههههههه وشاي رويال دا للي مش عارفه مهمته في هذه الحياة إنه يمسح بأستيكة كل اللي أكلته...يعني يخلي الواحد ما يستفيدش بأي حاجة تدخل المعدة. المهم...كدا المعدة فااااضية وتمام التمام نبدأ الريجيم أول يوم...فطار فاكهة، والغدا سلطة وبروتين، والعشا زبادي لايت تاني يوم شرحه...بس أروح الجيم بعد الغدا...يتهد حيلي شوية من الجري والتنطيط...أقف على الميزان ومفيش ولا جرام نزل...يادي الإحباط. تالت يوم...الفطار فاكهة والغدا...ماما طبخت أكل عادي ملوش علاقة بالريجيم...حآكل معلقتين بس. يووووه زهقت من السلطة...خلاص حآكل الخيار لوحده والعيش السن ملوش طعم...خلاص حآكل ملعقتين أرز فقط. والعشا...عيب بقى...كلي زبادي وبعدها رويال. اللي بعده الإفطار فاكهة(على فكرة دا مش نظام غذائي مخصوص...كل الحكاية إني مش فاضية أكل زي أنظمة الريجيم التقليدية). المهم الغدا أكل عادي...ما أنا حاروح الجيم وأهضمه. بس ماما عاوزة حاجات من السوبر ماركت... حاضر وأنا جاية من الجيم. الأول أجيب اللي ماما عاوزاه وبعدين أجيب الزبادي الدايت...لحد هنا مؤدبيييييين. المشكلة في اللي بعد كدا... لنا عودة
|
||||
|
06-22-2010, 03:32 AM
|
#6 | ||||
|
تابع اليوم المنتظر...قصدي يوم الفري
المشكلة في اللي بعد كدا... قبل ما أوصل الكاشير لاااااازم أعدي على ركن الشوكلاتة والشيبسي مفيش طريق غيره... الواحد بيبقى عاوز يغمض عينه وهو معدي... اللهم إخزيك يا شوشو(يعني يا شيطان)  والمشكلة إن أحلى عروض خاصة في القسم دا... اشتري 5 بار مارس أو سنيكرز تاخد واحد هدية(وحالياً 6 عليهم 3...عااااااا ظلم والله) اشتري 3 بسكويت بالكريمة بسعر 2 اشتري جالاكسي هازل بنص التمن اشتري 3 شيبسي عائلي بسعر 2 اشتري 3 شوكلاتة سايلة بسعر 2 اشمعنى دايماً 3 بسعر 2؟؟؟  هو حد مسلطهم علينا؟؟؟  طب أنا حابقى قنوعة  عرض شوكلاته سايلة وعرض شيبسي كفاية، وحأقسمهم مع اختي يوم الفري.. بس البسكوت دا أنا بحبه...خلاص حاجيب واحد كمان طب ومارس؟؟؟ خلاص بلاش الشوكلاته السايلة في سبيل مارس وطعم الكراميل المغري...ممممم  كفاية كدا ويالا عالكاشير تك تك تك الحساب يا أنسة وشيلي يا أنسة وروحي البيت استني ماما عاوزة بقسماط (شابورة يعني)...بس القرص ريحتها وهي سخنة فظيعة... طب حآخد قرصتين بس واحدة ليا وواحدة لمامتي آااااااااه...تعبت قوي النهاردة في الجيم، ولازم أكافئ نفسي خلاص حآخد فري لمدة ساعة واحدة بس... كيس شيبسي عائلي مع القرص والكاتشب و و و...(بس مش لوحدي يعني...مامتي معايا) وحتى لو لوحدي...عادي ما أنا حاشرب رويال. تاني يوم...الإفطار فاكهة...وعالساعة 12...مارس في الفريزر لوحدها...معقولة تهون عليا؟؟؟ خلاص حآخد حتة صغنووونة. حتة مارس على قطعتين بسكوت...حاسة إني أكلت مسكر كتير...طب شريحتين شيبسي عالماشي...وراح الكيس عالغدا...لازم النهاردة مكرونة يعني؟؟؟خلاص معلقتين كفاية والعشا...لاااااااا زودتيها النهاردة...مفيش غير زبادي، وعند فيكي كمان رويال اليوم السادس...آاااااخر يوم في الريجيم...الفطار فاكهة، والغدا ملعقتين أرز وبروتين، والعشا... فيه إيه؟؟؟ العشا فرييييييي  فري في العشا ولمدة 24 ساعة عرض مستمررررررررر... الفطار بسكويت والغدا مكرونة بالبشاميل أو محشي، وبعدين ايس كريم معتبر وبعدين باقي الشيبسي من العرض إياه... وفي آخر الليل فنجان رويال(فري 36 ساعة)ولنا عودة
|
||||
|
06-22-2010, 03:35 AM
|
#7 | ||||
|
تابع اليوم المنتظر...قصدي يوم الفري
بالله عليكوا كدا أنا عملت ريجيم كام يوم؟؟؟ يومين ونص؟؟؟ طب العيب فيا ولا في السوبر ماركت ولا في الجيم؟؟؟ ولا هي أصلا ثقافة غلط؟؟؟ ثقافة إستهلاكية تقنعك إنك الكسبان لو لحقت العرض الخاص دا... كسبان إيه؟؟؟ أخدته بنص التمن أو أخدت واحد هدية؟ طب أخدت كااااااام سعر حراري انت مش محتاجهم؟؟؟ هي كل علاقتنا بالريجيم إن الهدوم اللي ضاقت علينا ترجع تتلبس بسهولة؟ وكل علاقتنا بالرياضة هي المشي لحد الشغل أو السوبر ماركت؟ ليه الأكل ما يبقاش نظام حياة نمشي عليه على طول... يعني بتحب الشوكلاتة ماشي...بس ما تاكلش كتير بتحب المكرونة بالبشاميل وماله...بس قطعة واحدة كفاية بتحب الكبسة حقك...بس مش لازم تاكل التبسي كله بتحب الحلا مع القهوة تمام...بس طعم القهوة لوحدها حلو برضه، والحلا الخفيف أفيد من الحلا اللي كله دريم ويب ولبن مكثف وقشطة و و و كل الأكل حلو وأكيد له فايدة...بس ناكل بحساب لإن مهما كانت حلاوة الأكل...أكيد نعمة الصحة أحلى وليه الرياضة ما تبقاش جزء أساسي في حياتنا؟؟؟ يعني المشي لحد الشغل أو السوبر ماركت كويس بس ليه ما يبقاش ساعة يومياً لأي مكان دون توقف؟ ليه اللي يقدر ما يروحش الجيم ويغير نشاطه لو حتى 3 مرات أسبوعياً؟؟ التنطيط حيخليه يخرج الضغط العصبي اللي جواه، وأكيد التمارين حتحسن الصحة العامة، وفي الوقت نفسه حترسم الجسم بعيداً عن الترهلات(ودا ينطبق على الجميع) وكمان حيبقى فيه فرصه لمقابلة ناس جديدة وتوسيع دائرة المعارف يعني أكيد الرياضة فيها فوايد كتييير....مش بس تنقيص الوزن هل فكرنا بأه نغير نظام حياتنا للأحسن؟ فكرنا ما نبقاش مستهلكين بس؟؟؟ فكرنا نطبق مقولة "الحركة بركة"؟ اللي بتنصحكم دي مشكلتها في الحياة حاجتين: 6 كيلو زيادة عن الوزن اللي أنا عاوزاه، وهواية الأكل بغلاسة لما أكون متضايقة، ومش أي أكل...أنا صاحبة مزاج...لاااااااازم تكون شوكلاتة. وزني مش مسبب لي مشكلة لإنه طبيعي...بس أنا عاوزة أنزل الكام كيلو دول أعتقد إني ممكن أقضي على المشكلة الأولى لو حبيت.. بس المشكلة التانية أصعب...اعمل إيه عشان ما اتضايقش؟؟؟؟ وإلى لقاء في يومية جديدة رباب ملحوظة...إضطريت أحط اليومية في أكثر من مشاركة لإني عاملاها كدا اصلا في الوورد...يعني مش لزيادة المشاركات ولا حاجة...شكرا
التعديل الأخير كان بواسطة : *قلب دبي* بتاريخ 06-23-2010 الساعة 12:38 AM |
||||
|
06-23-2010, 01:32 AM
|
#8 | ||||
|
22/6/2009
اليوم أسوأ ذكرى مررت بها
وربما يتضح وجهاً مختلفاً لي فأعذروني إن بدوت مكتئبة أو باعثة على الإكتئاب لأن هذا ما أشعر به أختي الحبيبة
اليوم يمر عام على آخر مرة رأيتك فيها... على آخر نفس تنفسته في هذه الدنيا... على أول صدمة تلقيتها في حياتي... على أصعب لحظة يمر بها إنسان... لحظة إنفراط العقد... نعم برحيلك إنفرط عقدنا، وصرنا خمسة فقط بعد أن ظللنا ستة طيلة ثلاثين عام. برحيلك أدركت للمرة الأولى كم كنت أحبك... برحيلك ندمت لأنني لم أحتضنك وأخبرك بمدى حبي لك... هل كنت تتوقعين رحيلك هكذا فجأة؟؟؟ ألهذا أمضيت آخر عشرة أيام من حياتك معي في غرفتي؟؟؟ ألهذا كنت أُصر على أن أعتني بك وبعلاجك حتى يوم دخولك المستشفى؟ ألهذا كان قلبي مقبوضاً ولم أشعر بالسعادة في يوم مولدي؟؟ طيلة سنوات عمري لم نجلس سوياً مثل تلك الأيام... وكأن رحمة ربي تركتك عندنا حينها كي تقر أعيننا بك قبل أن تختفي عن ناظرينا. حينما رأيتك تلفظين أنفاسك الأخيرة لم أكن أتوقعها... ظللت أدعو الله وأستغفره منذ غيبوبتك... حتى في لحظاتك الأخيرة كان أملي كبيراً... قبلت يدك وقلت لك من أجلي أفيقي...من أجلي قاومي هذا المرض. لكنك آثرت ما عند الله... أختي الحبيبة مصابي فيك لا تصفه الكلمات، ولا الدموع... كلماتي التي تختنق بالعبرات إذا مر طيفك بخاطري... ودموعي التي لا تزال تنهمر كلما رأيت آخر صورة جمعتنا... والتي أخفيها عن الجميع، لاسيما أمنا... أتذكرين وصيتك؟؟؟ لا تخافي...نفذتها ودموعي تسبق لساني... نفذتها فقط لأني وعدتك، ولأني لم أستطع أن أخلف وعدي معك... طلبتها مني قبل أربع سنوات من وفاتك...كانت أمنية تحلمين بها... وحينما حان وقت تنفيذها فوجئت بنفسي وحيدة... وحيدة مع أمنيتك التي أضحت وصية. فهل أتجرأ وأنفذها؟؟؟ وتجرأت لأجلك. لأجلك حاولت أن تخرج زغرودتي العالية إحتفالاً بنجاح إبنك. وخرجت الزغرودة... ولكنها كانت جريحة، لأنك لم تكوني إلى جواري وأنا أطلقها له. لأنك لم تريه مرتدياً بدلته العسكرية التي تحمل أول نجمة... فالمرة الأولى التي ارتداها فيها كانت يوم جنازتك. في الحادية عشرة والنصف من مساء هذا اليوم قبل عام فقدتك... رأيت شقيقي الأكبر ينهار باكياً إلى جوار فراشك في العناية المركزة ولكني توقعته إنهياراً نابعاً من حزنه على حالك. رأيته يخرج إلينا من الباب الزجاجي والدمع يحرق وجهه ويحيل عينيه جمراً رأيته يحمل ملابسك النظيفة ويخرج بها ويشير إلي بالخروج ولم يسعفني لساني سوى بكلمة واحدة "خلاص؟؟؟" حتى حينما أومأ برأسه صامتاً لم أصدقه حاولت الدخول فمنعوني وخرجت لأجد الصدمة والذهول على وجوه الجميع حتى حينما سمحوا لنا بالدخول لإلقاء نظرة الوداع حينما قبلت جبهتك ويدك كنت أتخيلني في كابوس مؤلم سرعان ما أفيق منه عجيب أمر الإنسان رأيت كابوساً فيما مضى، وتخيلت وفاتك فيه...ظللت أبكي في نومي حتى أفقت وحمدت الله أنه كابوس ويوم وفاتك...رأيتك حية في نومي، ورأيتني أجري إليك أضمك وأهتف "أنت حية...لقد كان موتك كابوساً"... لكنني للأسف، ما أن أفقت حتى وجدت الحقيقة الأليمة أنك لم تعودي بيننا. وقتها تمنيت لو ظللت نائمة كيلا افارقك. غاليتي أصل النور في حياتنا، والذي إشتُق منه أسمك... لم أتجاوز صدمتك حتى الآن، ولكن عزائي أننا نحتسبك شهيدة، وأننا ندعو الله أن تكوني مع الصديقين والشهداء وحسن أولئك رفيقاً... أختك الصغرى
|
||||
|
06-25-2010, 06:25 PM
|
#9 | ||||
|
وأخييييييييراً الجمعة
السلام عليكم ورحمة الله وبركاته( فيس مكسوف وبيستأذن
 )أعتذر عن جرعة الكآبة الزايدة اللي كانت في اليومية الاخيرة...بس الصراحة دي مكانتش نقطة في بحر مشاعري وقتها وأنا باكتب وذكرياتي بتحاصرني ودموعي بتسبق صوابعي على الكي بورد.... بجد الله لا يحرم مسلم من أحبائه. طبعاً لي عودة على الردود والتقييمات اللي جاتلي على اليوميات الاخيرة، بس النهاردة حبيت افك تاني عن نفسي...بس مش بكآبة والله النهاردة الجمعة... وبغض النظر عن إنه العيد الاسبوعي للمسلمين، وعن إن فيه ساعة إجابة ربنا يكرمنا بيها يارب وبغض النظر عن إنه يوم التنظيف العالمي في كل بيوت مصر عندي الجمعة تختلف لسببين الاول إنه عندي يوم شغل عادي جداً لإني باشتغل في مركز أمريكي(فتخيلوا الكآبة إن الكل مأجز إلا أنا) لكن السبب الاحلى، هو إنه نهاية اسبوع العمل بالنسبة لي، وبعدها أجاااااااااااازة حتى مساء الاحد (يعني يومين بالعند في اللي اجزوا من غيري) ياهووووووووووووووو (مش باقوللكم مودي؟)طبعاً السؤال دلوقتي الست الفرحانة بالاجازة دي حتعمل فيها ايه؟؟؟ ودي عايزة سؤال؟؟؟حاسافر البلد طبعاً إن شاء الله والبلد دي عندنا في العيلة يعني قرية الوالد الله يرحمه لكن بالنسبة لي البلد حاجة تانية البلد مش بس بيت مختلف وأراضي زراعية وهوا يرد الروح البلد فيها أهلي وأهل والدي وبيتي وأرضي و... وأهم حاجة أجمل ذكريات من طفولتي العيد زمان كان بالنسبة لي مش بس لبس جديد وكحك وعيدية
العيد بالنسبة لي كان إني اسافر البلد ليه؟؟؟ عشان العب مع قريباتي كنا اربع بنات فوق روس بعض زي ما بيقولوا بس انا واتنين كمان كنا قريبين اكتر من بعض والاحلى ان كلنا اسمائنا بتبدأ بحرف الراء انا كنت الوسطى وواحدة اكبر مني بسنة والتانية اصغر مني بسنتين تصدقوا إني لحد دلوقتي العيد عندي من غير البلد ملوش طعم؟؟؟ رغم اني مش بالعب زي زمان مع صاحباتي...بس بالعب مع بناتهم...الله يبارك فيهم بسبوسة وهنوش (هما البنتين اللي في البوم صوري على فكرة) النهاردة إن شاء الله رايحة البلد مشوار سريع...يعني واجبات اجتماعية عشان كدا حاغيب عن المنتدى يمكن لحد بكرة بالليل ان شاء الله وأوعدكم لما ارجع ان شاء الله انزل صور البلد اللي صورتها من شهرين لما كنت هناك آخر مرة ولو صورت حاجة جديدة حانزلها برضه ان شاء الله يالا استودعكم الله الذي لا تضيع ودائعه وسامحوني لو زعلت حد فيكم وأكيد انا مسامحاكم رباب
التعديل الأخير كان بواسطة : رباب فؤاد بتاريخ 06-25-2010 الساعة 06:27 PM |
||||
|
06-26-2010, 01:30 AM
|
#10 | ||||
|
مباااااااشر من قريتنا حصرياً لألم الامارات
السلاااااام عليكم ورحمة الله وبركاته
شفتوا...انا اكبر عيلة...رغم إني في البلد بس برضه ما مسكتش نفسي وجيت ليكم جري ههههه الحمد لله أهلي هنا بخير...عمتي وبنت عمتي واولاد عمتي وعمي وكل جيراني بس للاسف ما شفتش بسنتوتة ولا هنوش...مكانوش موجودين يالا متعوضة المرة الجاية ان شاء الله اكيد بتقولوا البنت دي ايييييه اللي قعدها عالنت؟؟؟وإيه اللي خلاها تدخل المنتدى؟؟؟ صراحة سبب قااااااااااااهر تخيلوا بعد ما نزلت اليومية السابقة بثواني...كنت باحتفل بأجازتي السعيدة وباستعد للسفر. وفجأة....تدااااااااااا تقرير عاجل لازم يخلص النهاردة ياجماعة من امبارح وانا بقول اللي عاااااااااايز تقارير يبعتها من بدري تقولوا ايه بأه...دا عيب الشغل في مجال الإعلام طب والحل؟؟؟الغي السفر؟؟؟نييييييفر شلت لابلوبي حبيبي وجيت عالبلد خلصت مشاويري الإجتماعية واتبسطت كتير...صراحة شعور رائع لما تلاقي أهلك فرحانين بدخولك عليهم فجأة بعد غياب شهر او شهرين...الله لا يحرمني من أهلي ولا يحرمكم جميعاً المهم لسة راجعة البيت وطيران على لابلوبي الحبيب...والمفاجأة لقيت نت في البيت...يعني مش حاضطر اشتغل باليو اس بي...فقلت عيب يعني يبقى فيه نت وما ادخلش ألمي الحبيب(كله حبيب كدا؟؟؟مفيش عزيز، مختار، شعبان، مندور...) وصراحة...طفشااااااااانة من الشغل كل الرموز الشريرةباين حد بص لي في الاجازة وقال اشمعنى رباب تاخد اجازة يومين...عااااااااا  مضطرة دلوقتي اشتغل...وداعاً يا ألمي حتى إشعار آخر صحيح...أجمل التهاني لأبناء عمي اللي حيتجوزوا الاسبوع دا  ...ربنا يسعدهم ويرزقهم الذرية الصالحة ياربوعقبال عندكم يا حبايب  رباب
|
||||
| العلامات المرجعية |
| عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف) | |
| أدوات الموضوع | |
| طرق العرض | تقييم هذا الموضوع |
|
|
العرض العادي
