يوميـآت " عآمـه " !

شهقه · #1 12-22-2010, 12:22 AM

السلام عليكم ورحمة الله وبركاته

الحمـدلله والصلاة والسلام على رسول الله .. سيدنا محمد صلى الله عليه وآله ..

في البدايه أرحب بكل من عطآني شوي من وقته وفتح صفحتي الخاصه وشيء يسعدني أكيد

أنا عضوه جديده بالمسمى وبالتواجد ولكني قديمه بالحضور

حيث أن لي يوميه سابقه للأسف شائت الظروف أني اهملها وعدت من جديد بأسم تعريفي جديد وبحياة جديده

بياناتي الشخصيه واضحه على اليمين .. أما عن اختيار اسم شهقه " فهو جاء من باب الصدفه لان تعبت وانا افكر في اسماء وكلها تم اختيارها "

أما عن عنوان اليوميه فخلوه لوقت ثاااني " تشويق "

..

..

هاذي افتتاحية اليوميه

وعادة تكون بداية التعريف بالشيء هي اصعب خطوه

ألقاكم على خير

شهقه · 12-22-2010, 12:22 PM

مساء الخيـــــر ..

كيف الحآل ؟؟ .... صبآحي اليوم كآن مختلف

أنجزت فيه مشاوير مهمه بالنسبه لي بمرافقة الوالده الله يخليها لي

..

..

..

من ناحيه ثانيه \

القراءه من أهم هواياتي وأحبها إلى قلبي ..

حيآتي من غير كتاب أو مجله أو حتى كتيب اعلانات على الاقل ! أحسها ممله

فـ قرأت في الايام الاخيره الفايته رواية " ألزهايمر " واايد حبيت الراويه وعرفت معلومات وايد حلوه عن مرض الزهايمر اللي أحب اقرأ عنه واتعلم

راح اقول لكم بيوميه قادمه إن شاء الله عن هالمرض أكثر

(( للعلم \\ الروايه من آخر اصدارات الراحل غازي القصيبي رحمه الله ... وأنا متأكده لو قرأتوها ماراح تتركون الكتاب إلا بعد الانتهاء منها ))
..

..

لي عوده بإذن الله

شهقه · 12-24-2010, 11:30 PM

مســااء النــووم

قبل أي شي وكل شيء .. توني كاتبه هاليوميه وانمسحت بالغلط أكره هالحركــــــه !

اليوم كآن يوم عادي مامن جديد

غير إن اسنااااني أتعب وأنا اقول العصب ذبحني شل ويهي وربي

وأقول بروح العياده وما ألقى وقت

..

..

وأنا داخله قريت عنوان يوميتي وتذكرت اني قلت لكم بقول سبب التسميه

تعودت سواء في دفاتري أو بالنت إذا بكتب عن شيء يخصني يكون العنوان " زاويه خاصه " . " عالمي الخاص " ..

أو أي عنوان يوحي بالخصوصيه ,,, وحبيت هالمره اغيّر أخلي اليوميه بشكل عآم وبعيد عن العنوان اللي يدل على الخصوصيه

شرآيكم بالعنوان انتوا ؟؟

..

..

ومن زاويه ثانيه \\

في أحد حب اليوميه من بدايتها ؟؟ حسب ظني لا للحيييين

..

..

آخر شيء أقوله لكم أني هالايام في طور الاستعدادات المبدئيه للكليه

بعد أيام بيبدأ أول كورس لي وأدعوووا لي يارب اتوفق ويكون كل شيء ميسر وسهل عليّ يارب

لي عودهـ بإذن الله

شهقه · 12-27-2010, 05:45 PM

مسـاء السعـاده

شخبآركم ؟ .. إن شاء الله بخير

أمااا عني فأنا الحمدلله تمام ,, يمكن تاعبه نفسي بالتفكير شوي لأن هاذي المرحله تعتبر مرحلة انتقال في حياتي

بكون مضغوطه واااايد الفتره الجايه إن شاء الله

والسبب أني بكون طالبه وموظفه بنفس الوقت

بس لابد من التعب إذا ابي احصل شهاده وأكون فخوره بنفسي اكثر ^^"

..

هذا غير أني عندي قرارات ثانيه لازم اتخذها خلال هالفتره الجايه بإذن الله

..
..
..

قد يتخلى عنا من نحب ,, يجعلنا نقف في منتصف الطريق فجأه دون سابق انذار

نرى حولنا فلا نجد سوى تلك المساحات الفارغه !!

ولابد من الصبــــــــر

!

,,

بـررب

شهقه · 01-01-2011, 10:06 PM

مســاااء الخيـراات

أحوووالكم ؟

من كم يوم ماكتبت يمكن لأن حسيت وقتي مضغوط شوي بالدوام ..

والله يعين كلها ايام وبصير مضغوطه بين دوام وكليه بس إن شاء الله خيررر

أنا متحمسه ويارب تتحقق أحلااامي ..

وأي على طاري الأحلام .. بما إن اليوم دخلنا سنه جديده .. أتمنى لكم جميعاً كل الخير والنجاح يارب بهالسنه

وتكون سنة تطور وإنجاز وتحقيق للأماااني قولوا آمين

..

..

بعيد عن هذا وذاك ..

قريت قبل كم يوم في مجلة سيدتي عن قصة لسيدة سعوديه وخادمتها الأندونيسيه

الشغاله ذبحت 4 أطفال لـ هالمره وهي ماتدري ولا شكت بشغالتها !!

يعني كل ماتجيب واحد الشغاله تذبحه وهو مامكمل الشهرين مع ان معاملتها لها ممتازه ..

بعد 8 سنين عرفوا بالموضوع من شغاله جديده جابوها

والصدمه ان كل هذا لأنها ماتحب اليهال !! تخيلوا

" كانت تذبحهم .. تجيب أبره فيها سم وتدخلها في مخ البيبي " لدرجة ان كل مره المستشفى يقولون ان البيبي مات بشكل طبيعي

الصراحه القصه أثرت فيني وعورت قلبي المره لأنها الحين تقريباً بتدش الخمسين وخلاص راحوا اربعه عيال لها ماعندها غيرهم

والأربعه كانت تسميهم " محمد " -.-

الله يصبرها يااارب ويفرج كربتها ويعوضها كل خير

8

8

ختاماً \\

صار لي موقف قبل دقايق ماحبيته كلش

واتمنى مايتكرر

برررب

شهقه · 01-03-2011, 09:48 AM

صبــااح الفل ..

عشآن معامله وحده هاذي 3 مره اروح فرع البنك حتى اليوم اللي عندي فيه اوف والمفروض انام شوي أريح .. رحت الفرع عشان ورقه !

كلها 6 ايام ان شاء الله وتبدى الدراسه وبعدين ماعندي ولا يوم راحه .. دوام 7 ايام فالاسبوع مابين دوامي وكليتي بس عاادي إن شاء الله اتوفق وتسير الأمور مثل ما انا ابيها

..

..

اليوم بيوصل كآس آسيا الدوحه أو بالأصح وصل .. وفي احتفالات واستقبال وطلبة المدارس فالكورنيش

يعني جوو ثااني .. مثل الجو يوم فزنا بتنظيم مونديال كأس العالم 2022

شعورنا يومها ماكان يوصف طآحت قلوبنا واحنا ننتظر الظرف وياترى فيه قطر وألا ؟؟

فرحة الشيخ محمد ودموعه وفرحة شيوخنا كلهم الله يحفظهم كانت لا تووصف واحنا كشعب قطري كنا كلنا فرحانين

وطبعاً معانا كل العرب والخليجيين وووو .. لأنه انجاز والحمدلله

هذا كان في 2-12

وفي 18-12 كانت احتفالات اليوم الوطني ونفس الشي مسيرات وغيره

أنا رحت العرض العسكري الصبح وكان وناسه وجو حلوو وقضيت باقي اليوم فالدوام ههههه

كان يومها عطله بس احنا دوامنا شغال 24\24 مهما كانت الظروف

بس يومها حقدت عليه ابي اروح احتفل

..
..

بقول لكم في يومياتي الجايه ان شاء الله عن تجربه عشتها للمره الأولى في حياتي

برررب

شهقه · 01-04-2011, 02:15 PM

إلهــــــي

أكاد أجزم بأن الحظ يرفض الوقوف لجانبي ولو لمره !!

..

موضوعي اللي أسعى له قاعد يتعقد بطريقه رهيبه الصراحه ماعرف اعصب والا اتضايق

يااارب يسر لي أمووري

شهقه · 01-05-2011, 11:24 PM

مســـااء الخير والسرور

للحين ولا تقييم ومادري اذا في حد أصلا يمر على يومياتي وحبها وإلا لا

اليوم كان اللقاء التعريفي لي فالكليه ,, استفدت وخذت شوية معلومات ولو اني كنت اعرفها سابقا من الطلبه السابقين

لكن بعد التكرار يعلم الشطااار كان يوم حلو ومقدمه حلوه وحماسيه لبداية أول كورس دراسي إن شاء الله

بعد اللقاء يادوب رجعت البيت ارتحت شوي وعقب رحت الدوام .. وكان عندنا وايد شغل بس الحمدلله هذا هو الوقت مر ورجعت البيت

..

قعدت فالدوام يوم فضيت شوي ورتبت جدولي ونسقته " بما اني اليوم استلمت الجدول " وعندي كم ساعه بريك الصراحه من الحين افكر شسوي فيهم واحترت هههههه مايمدي ارجع البيت وجذي

يالله تدبر عقب إن شاء الله

" بكره عندي مراجعه للبنك من جديد يااارب تتيسر هالمره عاد .. تعبت كل يوم رايحه وراجعه "

أي صح قلت قبل بقول لكم عن تجربه عشتها للمره الاولى في حياتي

لازلت عند وعدي بس انتظروني

شهقه · 01-08-2011, 08:40 PM

غداً بإذن الله أول يوم دراسي لي ..

يارب أسألك التوفيق لي وللجميع

خايفه شوووي

برررب وبرجع إن شاء الله أقول لكم شصار

شهقه · 01-11-2011, 03:13 PM

مسـاااء الخيـــر

ماقدرت أدخل الأحد وأقول عن أول يوم دراسي لان من الصبح لليل وأنا مشغوله وأمس نفس الشيء مابين الدوام والكليه

واليوم بس عندي كليه فقدرت أدخل وبسولف لكم شويء

الحمدلله كان اول يوم دراسي جيد تعرفنا ع بعض اكثر وعطونا كتب

بس طبعا للحين أول الكورس فـ في اساتذه مب موجودين وغير شوية في لخبطه

بس الحمدلله للحين حابه الوضع وايد وربي يتمم الأمور على جذي

..

..

مع دخلتي رحت لوحة التحكم قلت يمكن أشوف تقييم وتفاجأه انه في هذا أول تقييم لليوميه وأسعدني واايد

[ الله يوفقج يارب ويفتحها بويهج وييسر امورج وناطرين احداث اول يوم دراسي وبعد ناطرين نسمع عن التجربة اللي عشتيها للمره الاولى في حياتج..بالتوفيق "زحمة جروح" ]

ويوووفقج يارب تسلمين على هالدعوات الطيبه

تكلمت عن أول يوم بشكل عام بس الحدث الأهم اللي ماقلته إن اول يوم وقفت برى مبنى الكليه لان ماحصلت موقف وسكروا على سيارتي ولج ان تتخيلين الموقف ودموووعي والوهقه اللي كنت فيها

بتأخر ووراي دوام بس زين اللي جات صاحبة السياره عقب طووول صبر وانتظار بس وقتها انا كنت

هذا غير اني سائقه جديده يعني اول مره انحط بهالموقف

أما عن التجربه اللي بقول عنها

بعد بأجلها يوم

..

..

برررب

أدوات الموضوع
عرض صفحة طباعة الموضوع أرسل هذا الموضوع إلى اصدقائك
طرق العرض	تقييم هذا الموضوع
العرض العادي العرض المتطور العرض الشجري	تقييم هذا الموضوع:

عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف)