×.., الـــديــوانيـًـه ,..×

احم احم , > يتنحنح ,


تغطن يا حريم وألبسن براقعكن معي رجال ,


درب درب ,

السلام عليكم ورحمة الله وبركاته ..,

سلمكم الله ,

فكرة الموضوع ببساطه نبي ناخذ راحتنا بهالمكان ونحكي باللي يجي على بالنا .., تخيلو انكم في استراحه قاعدين وفالينها مع ربعكم وحبايبكم ..,

بعيد عن التكلف وعن الرسميه وعلى قولهم البساط أحمدي ,.

بتلقون كل من بيدلي بدلوه بموقف حصل له , أو موضوع حاب يناقشه , أو نقد مو بناء حاب يستعرضه , أو ذبّ وحشّ بخلق الله

حنّا نبي نبعد عن الذبّ والحش بخلق الله وعن كل المخالفات الشرعيه , ونسولف ونعلق على سوالف بعض .. كننا جالسين باستراحه بالضبط ,


السوالف مالها قيد , ومو معناته انها لازم تكون خالعه وخنفشاريه وبس .. اللي بخاطركم تسولفون فيه وبأي مجال .. لا يردكم الا الكيبورد ,

مع كامل الإلتزام بقوانين المنتدى , من البعد عن المواضيع السياسيه والعقائديه وإثارة النعرات العنصريه والطائفيه إلخ ..


الفكره جات عالسريع , وما تعمقت فيها واجد وطلعت بشكل حبّي ,

مابي أهذر عليكم واجد , أتمنى ان الفكره تروق لكم وتلقى لها صدى بصدوركم الرحبه .. وتنورنا بتفاعلكم اللي عهدناه عليكم يالشيوخ ..,





×شكر خاص لخيّتي خلف المعطف , وعسى عمرك طويل ..,



× يمنع دخول من هم تحت سن السابعه , > لا يشيخ



قولوا بسم الله وادخلو برجلكم اليمين ,




وحياكم الله بديوانيتـــًكم ..,

يـا مرحبا ترحيبـة البـدو .. بالبـرق ,
اللي لهم عاميـن .. مـا رحبـوا بـهْ

رحّب به أوسطهم , ومن فرحته : غرق ,
جفنه بدمـعً بلـل أطـراف ( ثوبـه )

البرق "شرق ", وهو له صويحباًً "شرق "..,
وبرقاًً بـصـدره .. بـارق ٍ مادروبـهْ

ياللي سرقت النوم والعافيـة : سَـرقْ
يازاد قلب اللـي هـواك ,و ( شروبـه )

تغيب ماهمّك وأنا لاحـي : الـورقْ
ولا تخـاف : مـن الجفـا والعقوبـه !

الوصل مرهم كبد .. وإلا الجفا : حَـرقْ
والصبر ينفض في غيابـك : "جيوبـه "

كسّرت كل أبواب وصلك : من الطرقْ
وغيرك طرق قلبي .. ولاني بصوبـهْ

واللي يريد الوصل .., يامكثر الطـرقْ
لو وقفوا كل ( العـرب ) فـي دروبـهْ ..,

ييه يابن فطيس , أنا اشهد انك شاعر كفو ..,



يالله حيهم يالربع مرةٍ لخّ > الترجمه > مرةٍ ثانيه ,

يطولي بعمرتس خيّتي " خلف المعطف " وتميز هالقسم هو وجودك يا بنت الاجواد ,


يالله حيها يتيمه , أن أشهد انك راعيتها , الكابتشينو محصلش



تونى قاعد أقلّب بالذاكره وأفكر وش نبتدي به من سوالف ..,

وينزّل الالهام عليّ ..,


تدرون لبى قلوبكم فيه بعض المواقف تنطبع بالذاكره وبالخفوق بشكل طبيعي , واذا استرجعها الواحد وعاد بالذاكره ريوس , حس بشعور جميل يدغدغ قليبه الصغيرون ..,

او حس شكثر هو كان غبي بذاك الوضع خخخ عاد كل واحد وحسب الموقف اللي يذكره ..,


و اللي ذكرته تو من نوعية الاشياء اللي لا ذكرتها تحس وش كثر انت كنت غبي وسخيف ! ..,


هالموقف صارله ابو 7 سنين يمكن او اكثر بس مستحيل انساه .., اذكر انه كان بيوم أربعاء , وانا بأولى ثانوي ,

اتصل عليّ اخوي الكبير وقالي لازم تمسك خط للمزرعه وفيه شغلات وصاني عليها .., قلت له على هالخشم وبالليل ابمسك خط ..

المهم انه قالى لا تبطي , والخميس الصبح لازم تكون هناك ..,

وتعرفون الاربعاء ويكند والواحد يبي يفلها مع ربعه وكذا ..,

فليتها ذاك اليوم وعيّنت من الله خير , وشفت من يقدر يخاويني من اخوياي وضبطت الامور , وعلى الساعه 1 وحنا ماسكين خط "للنعيريه "


كان معاي 5 شباب , واحد منهم الله يسعده اسمه بدر ,

بدر ذا يا جماعه عليه عيون ماشاء الله تقولون كاشح العالي .., وشعره من النوع اللي يجيك واقف ,

وغير كذا يعني بالليل لا جا الضو على عيونه تحسونه مثل القطو المهم انه يسوي حركات تحسونه جني خخخ ,

وانا قاعد اسولف مع الربع بالخط , وتعرفون عاد بالليل وماسكين خط تحلى سوالف الجن والسكن اعوذ بالله ,,

فا كانت هذي سالفتنا بالطريق ومستانسين وكل واحد قاعد يقول اللي عنده من معلومات ,


عاد ويطري على بالى عامل المرزعه !


عامل المزرعه سلمكم الله له عشر سنين عندنا , وما عمري شفت هندي مهايطي مثله ,

اسمه شمس الدين , ويا عليه قوة هياط عجيبه , تحسونه من اللي كان يتابع سوبرمان وسنشيرو وهو بزر واجد ,

ودايم هو يهايط عليّ ان الجن يأذونه وهو راقد ,بس هو ما يخاف وله طريقه يخليهم يمشون وحتى الحراميه بعد ما يخاف منهم > عاد هو ما يقول جن يقول شيطان خخخ ,


حتى مره ماتت لي نعجه , وشكيت فيه قلتله شمس الدين انت مسوي لها شي , المهم ويقعد يبربر على راسي حتى من ضمن الاعذار اللي قالها ان الشيطان هو اللي ذبح النعجه ,

واخرتها اللي اكتشفناه ان النعجه مقروصه ..,


فا وانا قاعد اسولف مع الشباب وقبل لا ناصل للمزرعه , قلت يا عيال ما ودكم نسوي مقلب بشمس الدين ؟؟

كلهم قالوا قدام ,

ونقعد نخطط علي ابو هنّود بالموتر , ليما وصلنا عند بوابة المزرعه , عاد هناك بالليل ظلمه ما تشوف احد ,


قبل لا ااوصل لدرب المزرعه طفيت نور الموتر ,ووقفته بعيد شوي على اساس ان حنا اتفقنا نتسلل عند غرفة العمال , ونخرعهم خخخ ,


> ياخذ له رشفه من كابتشينو يتيمة زايد ..,

>ما يبي يقول ان الكابتشينو مر , اشوا انك جبتي معتس باتشي ولا كان رحنا فيها خخخ ,


المهم يا الاجواد والله وننزل ونمشي لين قربنا من بوابة المزرعه , عاد البوابه بجنب غرفة العمال بالضبط ,

عاد خوينا بدر اللي اقولكم عليه , كان وقتها لابس ثوب , ويفسخ الثوب والفانيله ويقعد بسروال السنه , وياخذ من التراب الخبل ويرش على جسمه وشعره , وقسم بالله يا جماعه تقولون سكني , طالع من قبر وعليه عيون اعوذ بالله انا تروعت خخ ,

والربع الباقين تلطمو وكذا ,

وندخل للمزرعه عاد غرفة العمال فيها دريشتين , كل اثنين منّا راحو لوحده , وبدر قال انا بقعد عند الباب على اساس ارّوع اللي يطلع منهم ,

وابو طويله "انا " خخخ > رقيت فوق الجدار وطمرت فوق السقف غرفة العمال على اساس اخبط عليهم من فوق برجولي خخ

وصارو الشباب يهزون الدرايش ويطلعون اصوات كلاب وتسذا , وانا من فوق ادربك برجولى على العمال وبدر ينادي شمس الدين من عند الباب بصوت مدري شلون بس كنه فحيح حيّه خخخ ,

الله وكيلكم ما كملنا خمس دقايق الا نشوف العمال يفتحون النور ويقربعون بالغرفه , ويبربرون لبعض بس واضح انهم راااحو فيها ومحد استرجا يطلع راسه من الدريشه خخخخخخ ,

وننطرهم يطلعون من الغرفه محد طلع , يا ولد اطلعو ما عندكم احد ,


وأأشر لبدر يطق الباب ,

ويبعد بدر عن باب الغرفه ويرمي حصا على الباب والعيال مكملين بهز الدرايش والأصوات , وربي ياهو فلم رعب صدق , خخخ


شوي الا نسمع العمال يصيحون داخل الغرفه وبدر يرمي طوب على الباب ,وينادي شمس الدين ,


والا ما ندري الا اللي فتح الباب وحط رجله ررررررررررركض وهو يصرخ ,

وشوي الا اسمع العمال يبكون داخل الغرفه , عاد اللي راح يركض انا فطست عليه ضحك لانه طالع بالوزار وشسما حالته صعبه مسيكين , عاد يوم سمعت صياحهم رحمتهم , وقلت للشباب هدّو اللعب ,

نزلت تحت وناظرت كذا من فتحه بالجدار لقيت شمس الدين بارك بالارض وقاعد يصيح بضمير خخخخخخخخخخ ,

> والهياط اللي من عشر سنين وينه يابو خخخ الرجال راحت علومه ,

قالى بدر خل ادخل عليه الغرفه ,

ويدخل بدر الغرفه عليه ويتلّه من يده , تعرفون صوت القعود لا عزلته عن امه , يا شمس الدين طلع ذاك الصوت وقام يهذري شيطان شيطان شيطان خخخخ ,

وكان بالغرفه بعد عاملين معه يصيحون خخخ ,


انا يوم شفت الرجال كذا وانا اللي خلاص قلت بس حنا بنجيب أجلهم ,

واجيه اقوله شمس الدين هذا انا عساف , وش فيك انت حنا نمزح ,


والرجال مهوب يمي يقول شيطان وجسمه ينفض , وربعه يصيحون , واقول لبدر جب ماي خل نرش عليه ,

وارش عليه ماي واحاول اهديه , مافيه أمل , ويجون اخوياي يحاولون يهدون باقي العمال واللي طلع ما ندري وين راح ,


تعرفون يا جماعه يوم المسأله تكون في البدايه فله ومزح , ويقعد الواحد يضحك , شوي الا يطيح بشر أعماله !


والله العظيم يا انى يوم شفتهم كذا قلت بس العمال انهبلو وبروح فيها

بس الاثنين اللي كانو يصيحون تقولون كنهم هدو يوم عرفوني بس شمس الدين متشنج ,

يدينه تشنجت ورجلينه بعد , ما يتحرك ..,


ونحاول فيه , ما فيه أمل , قلت بس مالى الا اشيله وعلى اقرب مستشفى , عاد بذيك اللحضه أسودت الدنيا بعيني وقمت ألعن بحالى والعن بالعيال ,

ونطمره سلملكم الله بالموتر , وعلى المستوصف ,

عاد فيه دكتور سوداني هناك , الرجال اعرفه وكذا , ودايم اذا مرض احد العمال او انقرص نروح له ,


وحزّتها كان نايم الزول يا غير انه صحى ,

وندخل شمس الدين هناك , وأشرح للدكتور السالفه وعزا الله انى نخيته , قلتله تكفى شف لنا حل واستر علينا ترا الدعوه كانت مزح وانقلبت مصيبه ,

عطاه الدكتور أبره مهدئه وخلاه منسدح فوق السرير , ويعطيني هاك التهزيئه يوم قلتله السالفه ,

والله يا جماعه ما كان باقى الا انه يقبعني بالكرسي اللي قدامه ,

قالى صدق انك ما تستحي على وجهك وطفل , الرسول صلى الله عليه وسلم قال : من روّع مسلمًا روّعه الله يوم القيامة " ويستلمنى بمحاضره طويله عريضه , انا وجهي صار هالكبر > . < حسيت ودي ان الأرض تنشق وتبلعني انا والهطوف اللي معاي ,

وكل اللي كنت شايل همه ان شمس الدين يكون صابه شي ,

بس الحمد لله الدكتور رفق بحالى وطمني انه اللي جاه بس حالة خوف وهلع شديده ,

خليت الشباب يقعدون عنده , ورجعت انا للمزرعه اشوف باقي العمال وش صار بهم , ولا لقيت احد منهم فيه , وتاركين الانوار شغاله ,


قلت حلو حلو , أثر المصايب لا جات تجي سويّه ,


واحوس بالمزارع أدورهم قلت اكيد انهم راحو يم وحده من عزب العمال اللي بمزارع جيرانا ,

وفعلاً لقيتهم متجمعين عند عامل اسمه هارون , وهذا كبيرهم اللذي علمهم السحر وكلهم يسمعون حكيه , وزي ما تقولون العمده هناك لان العمال دايم يروحون له بمشاكلهم وكذا ,

وانا اشوف هارون وجهه يقمّر عيش , واناظر بعمالنا , كل واحد عيونه محمّره وحالته لله , وقاعد بجنبه عامل ثاني يواسيه ويطبطب عليه خخ ,


والا ينط لي هارون : ايش يبقا!!


قلت أجل من أولها بيكرشني , واحاول اسوي نفسي بريئ واسحبه على جنب , واعتذر له ومن هالحكي ,

ويهزأني بعد هو وخشته وانا بالعها وساكت , لين قالى انه اتصل على اخوي ابو محمد وان العمال ما راح يرجعون للمزرعه الا بعد ما يجي اخوي بنفسه وياخذهم ,!


انا مجرد ما سمعت انه اتصل على ابو محمد " اخوي الكبير " قلت بس , اتشهد على روحك يابو العساسيف , عزا الله انك رحت وطي ,

عاد جوالي مدري وينه من يوم صار كل هالفلم , وارجع للموتر ادور الجوال , والقى ولا مليون مكالمه من اخوي ,

واتصل عليه , الساعه وقتها على قريب الفجر , واول ما رد عليّ قالى , خلك بالمزرعه ولا تتحرك ..,


طوط طوط طوط ,



> ما يحتاج أقولكم وش صار بعدها , يا انى اكلت تبن عزكم الله على هالسالفه , يا انى تبقّست تبقّس وانلعن خامسي لين عضيت الأرض خخخخ

لا وفوق هذا كله انسحب منى الموتر , صرت مقزرها مع اخوياي قعدت يمكن بعدها ترم كامل من غير موتر ,

بس يعلم الله انه درس خذيته بحياتي مستحيل أكرره ,


اعوذ بالله من هالمزح , واعوذ بالله من هالتفكير الغبي والمريض ,هالحين يوم الواحد كبر وعقل , يقول من جد شكثر انا كنت غبي وسخيف يا ترى انا كان عندي مخ ولا كانت بمخي > كرة تنس ؟؟

والله حاله ,


ما يستفاد من السالفه اللي فوق : اللي يقعد يهايط ويسويلك فيها انه القوي واللي محد قده , إعرف انه خيخه وما عنده سالفه وقت الصدقيه خخ ,

: اللي بيسوي انه الولد راعي المقالب ويبي يفلها مع ربعه يتأكد انه > بيتفقع وجهه وبينسحب منه الموتر نفس حالتى , وغير كذا راح يتهزأ من كل من هبّ ودبّ , وربعه بياكلون تبن معاه خخ

: اللي عنده خوي او صديقه نفس بدر خويي > يفصلها معه من الحين خخخ ,


مدري وش اقول بعد ,

بس هالسالفه طرت على بالى وسدحتها ,


لكم المايك ,

وعليكم السلام ورحمة الله وبركاته ,


يالله حيّها ,

> صب القهوه يا ولد وإزبح الزبيحه ,


> مصري بدوي ,


أبشرتس حنّا بخير وسهاله , علومتس خيّتي ؟


ايه ان اشهد ان حجابك ما نقول انه هو عفافك , لان العفاف عفاف النفس ,

لكنه مظهر من مظاهر العفاف والحشمه , اللي للأسف ناس واجد الحين قامت تحاربه ,

أو تحاول تطلّعه من مفهومه الرائع ,

وبدل لا يصير الحجاب مظهر من مظاهر العفاف والستر , صار فتنه يالله الخراج!

> سوّا سالفه من اسم مستعار خخ ,

> وش أحس فيه ,


بس صدق يا جماعه هالأيام الواحد صار يستغرب من تفكير بعض الخوات اللي يهديهن ,

عباتها تقل فستان موب عباه !

الفراشه , الأخطبوط , المدري وش , عباية سبايدر مان خخ > هذي كلها اسامي عبايات ترا

والله انى استغرب من بعض البنيّات الله يهديهن ,

وشوله لابسه عباه اذا مو للستر !


قبل لا اسافر كنت بالراشد رايح اشتري لي نعال عزكم الله ,

المهم يوم جيت احاسب واذا بالكائن الفضائي اللي قدامي !

راسها الله يهديها صاير كنه كمثرى ضخمه !

او تحسونها من المخلوقات الفضائيه اللي حول روسهم شي زجاجي مدور ., يعني انا استغرب هم من جدهم على بالهم هالشي حلو ؟

لا صار راسها وش كبره ؟؟


يعني وش ميزة انها تنفخ راسها بهالمنظر والله انى استعجب خخخ ,

يالله على قولهم , يا قلبى لا تحزن ,

وش رايكم بهالموضوع ؟

يه يه يه ..


رجع القسم .


يالله حيّهم ,



رونق , منوره الحته واللهي ,

والله يطول بعمرك ويسلمك من كل شر ..,



حكيم زماته , أرررحب

شيلات , ليكون خبيتي ولا سامري ..

تكفى يا معود ما نبي استنزال بالديوانيه ..

> ترا فيني عرق دواسر خخخخ



بنزل أشرب ماي وأرجع ,


لحد يروح عندي لكم سالفه .






بربونه